TƏCAVÜZKAR ERMƏNİSTAN İNSANLIĞA QARŞI CİNAYƏTLƏR TÖRƏTMƏKDƏ İTTİHAM OLUNUR
Milli Məclisin deputatı R.Hüseynov bu sənədlə əlaqədar AZƏRTAC-ın xüsusi müxbirinə demişdir: Hələ 2001-ci ilin aprel ayında, Avropa Şurası Parlament Assambleyasında həqiqi üzv kimi fəaliyyətə başladığımız ilk vaxtlarda biz “Ermənistanın Azərbaycan xalqına qarşı törətdiyi soyqırımının tanınması haqqında” sənəd hazırlamışdıq. Onun hazırlanmasının təşəbbüskarı Azərbaycan nümayəndə heyətinin o zamankı rəhbəri, ölkəmizin indiki Prezidenti İlham Əliyev idi. Sənədi imzalamış ilk şəxslərdən biri siyasi komitənin o vaxtkı rəhbəri, Avropa Şurasının indiki baş katibi Terri Devis olmuşdur.
Ötən beş il ərzində Azərbaycan nümayəndə heyəti Ermənistanın ölkəmizə qarşı təcavüzkar siyasətinin ifşa edilməsi istiqamətində xeyli iş görmüş, ciddi sənədlər hazırlamışdır. İndi təqdim olunmuş sənəd bu yöndə mühüm addımlardan biri kimi dəyərləndirilə bilər. Ermənistanın Azərbaycana qarşı apardığı soyqırımı siyasəti bir əsrdən artıq müddəti əhatə edir. Terror aktları, qanlı cinayətlər, sui-qəsdlər, partlayışlar və müxtəlif təxribatlarla müşayiət olunan bu soyqırımının ayrı-ayrı məqamlarını əks etdirən çoxlu sənədlər, dəlil-sübutlar və fotolar mövcuddur. Biz həm dünya parlamentləri ilə əlaqələr qurmalı, dünyanın ən müxtəlif nüfuzlu mətbuat orqanlarında çıxış etməli, həm də bu sənədlərin toplu halında xarici dillərdə nəşr etdirilməsi üçün xeyli iş görməliyik.
Ermənilərin Azərbaycan xalqına qarşı törətdiyi soyqırımı siyasəti bəzən faşistlərin ölüm düşərgələrində törətdiyi cinayətləri belə kölgədə qoyur. Ermənistan Azərbaycana qarşı milli nifrət üzərində köklənmiş siyasətini həyata keçirərkən, eyni zamanda, insanlıq əleyhinə çox ağır cinayətlər törətmişdir. Bu cinayətlər cəzasız qalmamalı, mütləq dünyanın ali hüquq müstəvisinə çıxarılmalı, hüquqi və siyasi qiymətini almalı, Ermənistan törətdiyi bu əməllərə görə layiqli cəzasına çatmalıdır.
Təşəbbüs xarakteri daşıyan sənəd bu sahədə ciddi addımlar atmaq üçün çağırışdır və Avropa Şurasını, Avropa İnsan Hüquqları Məhkəməsini, digər nüfuzlu beynəlxalq təşkilatları bu problemə ciddi diqqət yönəltməyə, konkret tədbirlər görməyə səsləyir.
Sənəddə deyilir:
XX əsrin bütün onillikləri boyunca Azərbaycan xalqına qarşı planlı şəkildə soyqırımı və terror siyasəti aparmış Ermənistan bu müddət ərzində bütövlükdə 1 milyona yaxın insanın ən qəddar üsullarla qətlə yetirilməsinə nail olmuşdur. Azərbaycan xalqını məhv etməyə yönəlmiş və icrası zamanı işgəncələrin ən dəhşətli formalarından istifadə edilmiş bu soyqırımı və terror aktları Ermənistan tərəfindən bu gün də bioloji və ekoloji terror, işğal altında saxladığı ərazilərdə nüvə tullantıları qəbiristanlıqları yaratmaqla davam etdirilməkdədir. Ermənilərin 1905, 1918, 1920, 1930-1937, 1948-1953, 1988-1992-ci illərdə azərbaycanlıları bir millət olaraq yox etmək məqsədi daşıyan və insanlıq əleyhinə ən ağır cinayətlər qəbilindən olan kütləvi qırğınlarla müşayiət edilən əməllərini danılmaz şəkildə sübut və ifşa edən çoxlu əşyai-dəlillər, yazılı sənədlər, fotolar, xronikal lentlər, şahid ifadələri və s. mövcuddur. İnsanları məscidlərə və digər qapalı binalara yığaraq toplu halında diri-diri yandırmaq, hamilə qadınların qarnını deşərək, onları hələ dünyaya gəlməmiş körpələri ilə birgə həlak etmək, valideynlərin gözü qarşısında uşaqları işgəncə ilə öldürmək, insanları beton boru içərisinə dolduraraq hər iki tərəfdən hörməklə öldürmək, qoca kişi və qadınların gözlərini çıxararaq, ayrı-ayrı bədən üzvlərini kəsərək qətlə yetirmək və s. cinayətlər silsiləsi Ermənistanın, əslində, yalnız azərbaycanlılara qarşı deyil, ümumiyyətlə bəşəriyyətə qarşı törətdiyi cinayətlərdir və bunlar mütləq beynəlxalq hüquq normaları çərçivəsində araşdırılmalı, konkret cəzası müəyyənləşdirilməlidir. 1992-ci ilin 26 fevralında Ermənistan hərbi qüvvələri əhalisinin əsas hissəsi qocalardan, qadınlardan, uşaqlardan ibarət Xocalı şəhərini bir gecədə viran etmiş, yüzlərlə insanı faşist ölüm düşərgələrində törədilmiş ən sadist üsulla icra edilən qətlləri belə kölgədə qoyan xüsusi amansızlıqla məhv etmişlər. Müasir dünyanın ən böyük faciələrindən olan Xocalı soyqırımı zamanı Ermənistanın törətdiyi insanlığa qarşı genişmiqyaslı cinayət faktları ilə əlaqədar çoxlu sayda sənədlər və sübutlar ortadadır. Bütün bunların müqabilində Ermənistan heç bir cəzaya məruz qalmadığından cinayətkar əməllərinin çərçivəsini və çeşidlərini durmadan artırır, bu gün də təcavüzkar siyasətini davam etdirir, dövlət səviyyəsində terrorizmi dəstəkləyir və Azərbaycanın işğal altındakı ərazilərində terrorçuların təlim düşərgələrini yerləşdirir, narkotiklərin yetişdirilməsi və biznesi ilə məşğul olur. Ona görə də insanlıq əleyhinə olan cinayətkar əməlləri mahiyyət etibarilə Ermənistanın üzvü olduğu və bu əməllərin siyasi, hüquqi qiymətini verməyən beynəlxalq təşkilatlar üçün də məsuliyyət müəyyən edir.
Bütün bunları nəzərə alaraq, Rafael Hüseynov Nazirlər Komitəsindən sual edir:
Son 100 il ərzində planlı şəkildə, ardıcıl olaraq Azərbaycan xalqını məhv etməyə istiqamətlənən və kütləvi qırğınlarla müşayiət edilən soyqırımı siyasəti aparmış, bu məqsədini icra edərkən insanlıq əleyhinə olan ən ağır qanlı cinayətlər törətmiş Ermənistanın belə əməllərinə siyasi və hüquqi qiymət verilməsi üçün Nazirlər Komitəsi hansı müzakirələr apara, bu problemin Avropa İnsan Hüquqları Məhkəməsində baxılması üçün hansı zəmanətlər verə və nəhayət, Avropa Şurasının prinsipləri ilə qətiyyən uyğun gəlməyən bu təcavüzkar ölkənin təşkilatın sıralarından kənarlaşdırılması üçün öz səlahiyyətləri çərçivəsində hansı konkret, qəti addımı ata bilər?
Sənədin müəllifi demişdir ki, yaxın zamanlarda Nazirlər Komitəsində bu sənədin müzakirəsi gözlənilir. Lakin bu problem çox ciddi xarakter daşıdığına görə, həmin məsələni digər aspektlərdən əhatə edən başqa bir sənəd də hazırlanır. İndiki sessiyanın gedişi zamanı müvafiq imzalar toplandıqdan sonra həmin sənəd də katibliyə təqdim ediləcəkdir. Güman edilir ki, hər iki sənəd həm AŞPA-nın bürosunda, həm Nazirlər Komitəsində, həm də qurumun müvafiq komitələrində müzakirə edildikdən sonra Ermənistanın bu təşkilat çərçivəsindəki ifşası baxımından çox ciddi bir irəliləyişə nail olunacaqdır.
Bölmənin digər xəbərləri
