“...TƏDRİS PROQRAMININ İNKİŞAFI LAYİHƏSİ”NƏ DAİR MEMORANDUM İMZALANMIŞDIR

11.07.2004 [16:44]
Çap et
A⁺ A^-

İyulun 10-da Təhsil Nazirliyində bu qurum ilə Beynəlxalq Tədqiqatlar və Mübadilələr Şurası (İREX) arasında “Azərbaycanın orta məktəblərində sosial fənlər üzrə müəllim hazırlığı sahəsində Tədris Proqramının İnkişafı Layihəsi”nə dair razılıq memorandumu imzalanmışdır.

AZƏRTAC-ın müxbiri xəbər verir ki, ABŞ Dövlət Departamentinin Azadlığa Dəstək Aktı çərçivəsində maliyyələşdirdiyi bu layihə İREX tərəfindən həyata keçirilir.

İmzalanma mərasimində təhsil naziri Misir Mərdanov bildirmişdir ki, layihədən əsas məqsəd pedaqoji ixtisaslar verən ali məktəblərimizdə sosial fənlər üzrə müəllim hazırlamaqdır. Üç il ərzində həyata keçiriləcək layihədə 18 ali məktəb müəllimi iştirak edəcəkdir. Onlardan 6-sı ABŞ-da kurs keçmişdir.

İREX-in Azərbaycan üzrə rəhbəri Nigar Məmmədova layihənin istiqamətləri və mərhələləri barədə məlumat vermişdir.