Tengiz Txilava: Azərbaycan uğurlu daxili və xarici siyasətini sona qədər həyata keçirəcək
Tbilisi, 8 sentyabr, AZƏRTAC
Münaqişə başa çatıb. Ermənistan Azərbaycanın ərazi bütövlüyünü tanıdığını yüksək səslə bəyan edib. Bu o deməkdir ki, Qarabağ Azərbaycanın bir hissəsi kimi tanınır. Lakin təəssüf ki, biz son günlər Ermənistanın baş naziri Nikol Paşinyanın fəaliyyətində ağlasığmaz hadisələrin bir daha şahidi oluruq.
Bu sözləri gürcü politoloq Tengiz Txilava Ermənistanın baş naziri Nikol Paşinyanın regiondakı proseslərlə bağlı son bəyanatını AZƏRTAC-a şərh edərkən söyləyib.
Onun sözlərinə görə, Ermənistanın tanıyıb-tanımamasından asılı olmayaraq Qarabağ Azərbaycandır. Ermənistan hökuməti və hakimiyyət orqanları da bunu dərk edərək düzgün qərar qəbul ediblər və özləri də bəyan ediblər ki, Qarabağ Azərbaycandır!
Ermənistanın baş nazirinin söylədiyi sərsəm fikirlərin cəmiyyətdə çaşqınlıq yaratdığını diqqətə çatdıran politoloq əlavə edib: “Paşinyan bəyan edir ki, Azərbaycan Ermənistanı işğal etmək üçün sərhədə qüvvələr toplayır. Hamı bilir və mən yenə də xatırladıram ki, müharibə başlayandan bəri hərbi əməliyyatlar həmişə Azərbaycan ərazisində aparılıb. Lakin Azərbaycan heç vaxt Ermənistanı işğal etməyib, onun suveren ərazisinə iddia qaldırmayıb”.
Tengiz Txilava deyir ki, Azərbaycanın gücü var, hazırda ondan istifadə etmək istəmir. “Azərbaycan üç il əvvəl güc tətbiq edəndə nə baş verdiyini hamı gördü. Düşünmürəm ki, Ermənistanda kimsə bunu təkrarlanmasını bir daha görmək istəyir. Digər tərəfdən, Azərbaycan və Türkiyə artıq iki ildir ki, rəsmi müttəfiqdir. Mən regionda Azərbaycan və Türkiyəni ayrı-ayrılıqda təsəvvür edə bilmirəm. Ona görə də hesab edirəm ki, Paşinyanın bu bəyanatı, Fransa prezidenti Emmanuel Makronun Azərbaycan və Ermənistana səfəri ərəfəsində Ermənistan hakimiyyətinin növbəti eyforik, sərsəm düşüncəsidir. Təəssüf ki, Makronun sağlam düşüncəsinə də ümid azdır, lakin buna baxmayaraq, Ermənistanda bu səfərə böyük əhəmiyyət verirlər”, - deyə politoloq vurğulayıb.
O qeyd edib ki, Azərbaycan nə Makronla, nə də başqası ilə daxili və ya xarici siyasətini koordinasiya etmək fikrində deyil. Azərbaycanın özünün uğurlu siyasəti var və bunu sona qədər həyata keçirəcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
