Trampın Venesuelaya tətbiq etdiyi sanksiyalardan sonra neftin qiymətləri 1% artıb
Bakı, 17 dekabr, AZƏRTAC
ABŞ Prezidenti Donald Trampın Venesuelaya daxil olan və çıxan bütün sanksiyalı neft tankerlərinin “tam və hərtərəfli” blokadaya alınması göstərişindən sonra neft qiymətləri çərşənbə günü 1%-dən çox artıb. Bu, neft tələbatı ilə bağlı narahatlıqlar fonunda yeni geosiyasi gərginliyə səbəb olub.
AZƏRTAC xəbər verir ki, Brent markalı xam neftin fyuçersləri 79 sent və ya 1,3% artaraq barel üçün 59,71 dollara çatıb. “ABŞ-ın West Texas Intermediate nefti 77 sent və ya 1,4% artaraq barel üçün 56,04 dollara çatıb”, - deyə “Reuters” yazır.
Ötən sessiyada Rusiya və Ukrayna arasında sülh danışıqlarında irəliləyişlər fonunda neft qiymətləri beşillik minimum səviyyəyə yaxınlaşıb, çünki əldə edilən razılaşma Qərbin Moskvaya qarşı sanksiyalarının yumşaldılmasına səbəb ola bilər.
Çərşənbə axşamı Donald Tramp Venesuelaya daxil olan və çıxan bütün sanksiyalı neft tankerlərinin blokadaya alınması göstərişi verib və əlavə edib ki, o, indi ölkə hökumətini xarici terror təşkilatı kimi qəbul edir.
Ekspertlərin fikrincə, qiymət bu gün Venesueladan gələn xəbərlərlə əlaqəlidir, lakin ümumilikdə Venesueladan ixrac həcmləri qlobal təkliflə müqayisədə nisbətən böyük deyil. Rusiya ilə Ukrayna arasındakı danışıqlara diqqətin cəmləşdiyi şəraitdə bazar azalma riski altındadır.
Trampın son açıqlamaları ABŞ-ın Venesuela sahillərində sanksiyalı neft tankerini ələ keçirməsindən bir həftə sonra səsləndirilib.
Söhbətin neçə tankerdən getdiyi, ABŞ-ın sanksiyalı gəmilərə qarşı blokadanın necə tətbiq edəcəyi, eləcə də Trampın ötən həftə etdiyi kimi Sahil Mühafizəsinə gəmiləri ələ keçirmək üçün müraciət edib-etməyəcəyi də aydın deyil. Son aylarda ABŞ bölgəyə hərbi gəmilər göndərib.
Çin Venesuela neftinin ən böyük alıcısıdır. Analitiklər hesab edirlər ki, hazırda neft bazarı yaxşı təmin olunub, lakin embarqo uzun müddət davam edərsə, neft qiymətləri, ehtimal ki, artmağa davam edəcək.
Bölmənin digər xəbərləri
