TRT AZƏRBAYCANLA BAĞLI NÖVBƏTİ VERİLİŞ HAZIRLAMIŞDIR

19.05.2006 [02:45]
Çap et
A⁺ A^-

Azərbaycanın qabaqcıl ziyalılarının dilindən tariximizi, mədəniyyətimizi, ölkəmizin həyatında baş verən ictimai-siyasi hadisələri dünyaya yayan Türkiyə Radio-Televiziya Qurumunun (TRT) Bakı təmsilçiliyi “Ziyalılarla mədəniyyət gəzintiləri” adlı verilişinin növbəti buraxılışını hazırlamışdır. Proqramın budəfəki qonağı Milli Məclisin deputatı Aydın Mirzəzadədir.

TRT-nin Bakı təmsilçiliyindən AZƏRTAC-a bildirmişlər ki, A.Mirzəzadə ilə birlikdə respublikanın böyük şəhərlərindən olan Mingəçevirə səfər ediləcək, buradakı Şəhidlər xiyabanı ziyarət olunacaq, tarix muzeyinə və mədəniyyət abidələrinə baş çəkiləcək, şəhərin ölkə iqtisadiyyatındakı rolundan, təhsil müəssisələrinin fəaliyyətindən söhbət açılacaq.

Proqramda həmçinin gözləri görməyən, amma ruh dünyası ilə dünyanı işıqlandıran 15 yaşlı şairə Zeynəb Ədalətqızı və ən çətin zamanlarda dözümünü itirməyən, başıuca durmağı bacaran Böyükkişi Mirzəzadə ilə müsahibələr veriləcək.

Veriliş mayın 19-da Bakı vaxtilə saat 17.30-da TRT-TÜRK və həmin gün saat 22.10-da TRT-İNT kanallarında göstəriləcəkdir.