TÜRK MUSİQİSİNƏ YARASALAR DA MƏFTUNDUR

10.08.2004 [14:01]
Çap et
A⁺ A^-

AZƏRTAC-ın xarici informasiya agentliklərindən aldığı xəbərdə deyilir ki, Almaniyanın Visbaden şəhərində maraqlı bir hadisə baş vermişdir. Şəhərin qadın sakinlərindən birinin mənzilinə 40-dan çox yarasa soxulmuşdur. Evdə onların əlindən tərpənmək olmurdu. Belə “qonaq”larla bir dam altında yaşamaq nəinki xoşagəlməzdir, həm də çox təhlükəlidir. Məlumdur ki, qaranlıq düşən kimi yarasalar qarşılarına çıxan ev heyvanlarının üstünə cumur və onların qanını zəli kimi sorurlar. Onlar açıq səma altında və pəyələrdə yatan adamlara da rəhm etmirlər.

Bütün bunları bilən biçarə qadın kömək üçün polis çağırmışdır. Polislər bir çox vasitələrə əl atsalar da, amma bundan bir şey çıxmamışdır. Nəhayət, kiminsə ağlına qulaqbatırıcı texnomusiqidən istifadə etmək fikri gəlmişdir. Ev sahibəsi gurultulu musiqini çaldıran kimi yarasalar mənzili bir andaca tərk etmişlər. Mütəxəssisləri heyrət götürmüşdür: görəsən, yarasalar niyə adi evdəki bütün mənzillərdən məhz bu qadının mənzilini seçmişlər? Demə, bunun sirri sadə imiş: yarasalar Şərq musiqisinə, illah da türk musiqisinə məftundur, hay-küylü musiqini eşidən kimi pərən-pərən düşürlər. Həmin mənzildə yaşayan qadın isə türk imiş. O, hər gün doğma türk musiqisini dinləyirmiş.

TÜRK MUSİQİSİNƏ YARASALAR DA MƏFTUNDUR

MÜƏLLİFLƏ ƏLAQƏ

Bölmənin digər xəbərləri