TÜRKİYƏ 2020-Cİ İLDƏ KOSMOSA İLK ASTRONAVTINI GÖNDƏRƏCƏK

11.11.2005 [21:27]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, Türkiyə kosmik proqram çərçivəsində özünün ilk astronavtını kosmosa 2020-ci ildə göndərmək niyyətindədir. Bu məqsədlə Ankarada ABŞ Müdafiə Nazirliyi ilə Türkiyə Hərbi Hava Qüvvələri arasında müvafiq saziş imzalanmışdır.

Sənədə görə, ABŞ-ın Milli Aeronavtika və Kosmik Fəzanın Tədqiqi Agentliyi (NASA) təlim keçmək və kosmik sahədə müvafiq layihələri gerçəkləşdirmək üçün Türkiyəyə texnoloji dəstək göstərəcəkdir. Türkiyə astronavtları 2008-ci ildən təlim keçməyə başlayacaqlar. Təlim kursu 2015-ci ildə başa çatandan sonra gələcək astronavtlar qrupu NASA-da imtahan verəcək, onların arasından seçiləcək bir nəfər Yerətrafı orbitə uçacaqdır. Həmin namizəd ABŞ-ın kosmik proqramına daxil ediləcəkdir.

Güman edilir ki, amerikalılar və türkdən ibarət heyət kosmosda işləmək üçün 2020-ci ildə Yer kürəsini tərk edəcəkdir.