Türkiyə ordusu bir həftədə Suriya və İraqda 150 terrorçunu zərərsizləşdirib
Bakı, 9 oktyabr, AZƏRTAC
Türkiyə Silahlı Qüvvələri oktyabrın ilk həftəsində Suriya və İraqda 150 terrorçunu zərərsizləşdirib.
AZƏRTAC xəbər verir ki, TRT telekanalı bu barədə Türkiyənin müdafiə naziri Yaşar Gülərə istinadla məlumat yayıb.
“Oktyabrın 1-dən 8-dək Türkiyə Hərbi Hava Qüvvələrinin İraqın və Suriyanın şimalinda PKK/PYD qruplaşmalarına qarşı apardığı əməliyyatların gedişində 150-dən çox terrorçu zərərsizləşdirilib, terror təşkilatlarının obyektləri və gəlir mənbələri sıradan çıxarılıb”, - deyə məlumatda bildirilir.
Oktyabrın 1-də PKK silahlılarının Ankarada Daxili İşlər Nazirliyinin binasına hücumundan sonra Türkiyə ordusu İraqda və Suriyada terrorçulara qarşı əməliyyatları intensivləşdirib. Ekspertlərin fikrincə, Türkiyə Silahlı Qüvvələri ölkənin cənub sərhədləri yaxınlığında genişmiqyaslı quru əməliyyatına başlaya bilər. İraq və Suriyada əməliyyatlar keçirmək üçün ordunun mandatı var və mandatın uzadılması məsələsi oktyabrın sonunadək parlamentdə müzakirə olunacaq.
Bölmənin digər xəbərləri
