TÜRKİYƏDƏ KOKA-KOLANIN RESEPTİNİ AÇIQLAMAĞI MƏHKƏMƏ QAYDASI İLƏ TƏLƏB EDİRLƏR
Müqəddəs Nikolay Fondu Sülh Şurasının rəhbəri Müəmmər Qarabulud demişdir: “Ölkəmizdə qüvvədə olan İstehlakçılar haqqında qanuna əsasən, hər hansı qida məhsulunun istehsalçısı bu məhsulun tərkibindəki maddələr barədə alıcılara məlumat verməlidir”.
Onun sözlərinə görə, hətta qazlı su butulkalarında onun tərkibindəki maddələr haqqında ətraflı məlumat yazılır. Lakin Koka-Kola şirkəti istehlakçının almalı olduğu məlumatı gizlədir.
Qarabulud demişdir: “Uşaqlarımızın sağlamlığı naminə biz bilmək istəyirik ki, içkinin istehsalı üçün konkret olaraq hansı maddələrdən istifadə edilir və bu içki zərərli deyilmi. Əgər sərinləşdirici içkilərin etiketlərində onun tərkibindəki maddələr barədə ətraflı məlumat olmasa, Koka-Kola öz məhsulunu Türkiyədə istehsal edə bilməz”.
Müqəddəs Nikolay Fondunun irəli sürdüyü tələbi Avropada ən iri konsert və konqreslər mərkəzinin (İstanbul) sahibi Mustafa Özbəy də dəstəkləmişdir. O bildirmişdir ki, Koka-Kolanın və Pepsi-Kolanın insan sağlamlığı üçün zərərli olmadığı sübuta yetirilməsə, onların sentyabrda bu mərkəzdə satışı qadağan ediləcəkdir.
Məhkəmə Müqəddəs Nikolay Fondunun iddiasını təmin etsə, Türkiyə Koka-Kolanın satışına qadağa qoyulan daha bir ölkə olacaqdır. Bundan əvvəl tərkibində çoxlu pestisid olduğuna görəbu içkinin satışı Hindistanın bir neçə ştatında qadağan edilmişdir. Gələn aydan Latviya məktəblərində də analoji qadağa qüvvəyə minəcəkdir. Çünki ölkənin Səhiyyə Nazirliyi limonadın və qazlı içkilərin uşaqların sağlamlığı üçün zərərli olduğunu bildirmişdir.
Bölmənin digər xəbərləri
