Türkiyədə koronavirusdan son sutkada 176 nəfər ölüb
Ankara, 11 yanvar, AZƏRTAC
Yeni növ koronavirus (COVID-19) infeksiyası ilə mübarizə tədbirləri çərçivəsində Türkiyədə növbəti dəfə tətbiq olunan 56 satlıq “Evdə qal!” rejimi davam edir. Rejim qaydalarını pozanlara qarşı sərt tədbirlər görülür. Yanvarın 8-də Ankara vaxtı ilə saat 21.00-da qüvvəyə minən budəfəki məhdudiyyət rejimi yanvarın 11-də saat 5.00-dək davam edəcək.
AZƏRTAC Türkiyə Səhiyyə Nazirliyinə istinadla xəbər verir ki, yanvarın 10-da ölkə üzrə 162 min 786 nəfər testdən keçirilib. Onlardan 9 min 138 nəfərdə virus əlaməti aşkarlanıb, 1017 yoluxmuş şəxs xəstəxanalara yerləşdirilib. Məlum infeksiya səbəbindən son sutka ərzində 176 nəfər ölüb, 8 min 103 şəxs sağalıb.
Qeyd edək ki, Türkiyədə “Evdə qal!” rejimi həftənin ilk beş günü saat 21.00-da başlayıb səkkiz saat davam edir. Həftənin cümə günləri saat 21.00-da isə 56 satlıq “Evdə qal!” rejimi qüvvəyə minir. Rejim qaydalarını pozanlara qarşı ciddi tədbirlər görülür, o cümlədən pul cərimələri kəsilir.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
