Türkiyədə meşə yanğınları ilə mübarizə tədbirləri gücləndirilir
Ankara, 21 mart, AZƏRTAC
Ötən il Türkiyədə tüğyan edən meşə yanğınlarının yaratdığı risklər ölkənin aidiyyəti qurumlarını təbii fəlakətə qarşı əlavə mübarizə tədbirləri görməyə məcbur edir.
AZƏRTAC Anadolu Agentliyinə istinadla xəbər verir ki, bu barədə Meşəçilik İdarəsinin baş müdiri Bekir Karacabəy məlumat verib.
Məlumatda bildirilir ki, bu ilin yaz-yay mövsümü üçün 20 yanğınsöndürən təyyarə və 55 helikopter kirayə ediləcək. Təyyarələrin sayı ötən ilki ilə müqayisədə təxminən 7 dəfə, helikopterlər isə 15 ədəd çox olacaq. Müasir texnologiyalarla təchiz edilən 10 helikopter gecə saatları yanğına müdaxilə işlərinə cəlb ediləcək. Bundan başqa, 2020-ci ildə yanğınla mübarizəyə bir pilotsuz uçuş aparatı (PUA) cəlb edildiyi halda, bu il səkkiz PUA arsenala daxil ediləcək.
Qeyd edək ki, ötən il Anadolu bölgəsində tarixdə ən güclü meşə yanğınları baş verib. Azərbaycanda da meşə yanğınları riskinin böyük olmasına baxmayaraq, Prezident İlham Əliyevin göstərişi ilə çox sayda yanğınsöndürən texnika və canlı qüvvə kömək üçün qardaş ölkənin yardımına getmişdi. Azərbaycan yanğınsöndürənləri alovla fədakarcasına mübarizə apardılar. Qardaş ölkənin ictimaiyyəti bu fədakarlığı Azərbaycandakı Türkiyə sevgisinin real göstəricisi kimi dəyərləndirdi.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
