Norveçin həmkarlar ittifaqları Konstitusiya Günü etiraz aksiyaları keçirməklə hədələyirlər
Stokholm, 14 may, AZƏRTAC
Norveçdə hotel-restoran sektorunda davam edən tətil mayın 17-də Konstitusiya Günü ilə bağlı keçiriləcək bayram tədbirlərinə təsir edə bilər.
AZƏRTAC xəbər verir ki, “Fellesforbundet” və “Parat” həmkarlar ittifaqları əmək mübahisəsi üzrə tərəflər razılığa gələ bilməyəcəyi təqdirdə hotellər və restoranlar qarşısında piketlər təşkil etməyə hazır olduqlarını bildiriblər.
Ən çox diqqət paytaxtdakı “Grand Hotel Oslo”ya yönəlib. Ənənəvi bayram yürüşü məhz bu hotelin qarşısından keçir və burada Norveç biznes elitası üçün ən məşhur qəbullardan biri təşkil olunur. “Parat” həmkarlar ittifaqı hotel rəhbərliyini tətilin təsirlərini zəiflətmək məqsədilə müvəqqəti işçilər və təcrübəçilər cəlb etməkdə ittiham edib.
Hotel “Scandic Hotels” şəbəkəsinə məxsusdur. Şirkət tətil edən əməkdaşların yerinə işçi cəlb olunması ilə bağlı ittihamları rədd edib və fəaliyyətini qüvvədə olan qaydalara uyğun qurduğunu bildirib.
Sektorda tətil apreldən davam edir və tədricən genişlənir. Hazırda aksiyada 4 mindən çox işçi iştirak edir.
“Scandic” şirkəti mayın 17-də keçiriləcək ənənəvi tədbirləri mümkün qədər qoruyub saxlamağa çalışacağını vurğulayıb. Bununla yanaşı, davam edən münaqişə səbəbindən proqramda dəyişikliklərin edilə biləcəyini də istisna etməyib.
Bölmənin digər xəbərləri
