Türkiyədə qeydiyyatda olan 4 milyon 437 min əcnəbi yaşayır
İstanbul, 5 avqust, Günel Karatepe, AZƏRTAC
Hazırda Türkiyədə qeydiyyatda olan 4 milyon 437 min əcnəbi yaşayır. Onlardan 3 milyon 103 mini müvəqqəti qoruma altında olan suriyalı, 1 milyon 109 mini yaşayış icazəsi ilə ölkədə yaşayanlar, 224 mini isə beynəlxalq qoruma altında olanlardır.
AZƏRTAC xəbər verir ki, bunu Türkiyənin daxili işlər naziri Ali Yerlikaya açıqlayıb.
Nazirin sözlərinə görə, dünyada 300 milyon immiqrant var. BMT-nin Qaçqınlar üzrə Ali Komissarlığının hesablamalarına görə, bu 300 milyondan 123 milyonu evlərindən didərgin edilənlər, 47 milyonu isə qoruma altında olanlardır.
Ölkədə aparılan qeyri-qanuni miqrasiya və insan qaçaqmalçılığı ilə mübarizənin davam etdiyini vurğulayan Ali Yerlikaya Suriyanın şimalında keçirilən üç əməliyyat nəticəsində orada yaradılan təhlükəsiz bölgədən miqrasiya potensialı olan 4 milyondan çox insanın Türkiyəyə köçünün qarşısının alındığını deyib.
Türkiyənin sərhəd təhlükəsizliyi ilə bağlı məlumat verən nazir ötən ilin əvvəlindən indiyədək 202 min 705 qeyri-qanuni miqrantın ölkəyə girişinin qarşısının alındığını bildirib.
Qeyd edilib ki, Türkiyənin 81 vilayətində yaradılan səyyar immiqrasiya məntəqələri vasitəsilə təxminən 1 milyon 200 min nəfərin sorğusu aparılıb və onlardan 126 min 766-nın ölkədə qanunsuz yaşadığı aşkarlanıb. Türkiyənin 25 şəhərində 32 repatriasiya mərkəzi var və bu mərkəzlər vasitəsilə 121 xüsusi uçuşla 22 min 987 qeyri-qanuni miqrant ölkədən deportasiya edilib.
Bölmənin digər xəbərləri
