Türkiyəli ekspert: İsveçrənin qərəzli mövqeyi Cənubi Qafqazda sülhə xidmət etmir
Ankara, 28 may, AZƏRTAC
“İsveçrə də daxil olmaqla, bəzi Qərb dairələri erməni lobbisinin təhriki ilə ATƏT-in Minsk qrupunun “dirildilməsi” və artıq həll olunmuş Qarabağ məsələsi ətrafında isteriyanın yenidən alovlandırılması məqsədilə təxribat xarakterli addımlar atmağa davam edir.
Bu barədə Ankaradakı Avrasiya Araşdırmaları Mərkəzinin (AVİM) eksperti Selenay Erva Yalçın AZƏRTAC-a açıqlamasında bildirib.
Ekspert qeyd edib ki, Azərbaycanla Ermənistan arasında aparılan danışıqlar 44 günlük müharibənin nəticələrinin qəbuluna əsaslanır. Bu, eyni zamanda, Qarabağ məsələsinin artıq bağlandığı və müzakirə mövzusu olmadığı deməkdir. Ermənistanın rəsmi şəkildə Azərbaycanın ərazi bütövlüyünü və suverenliyini tanıması erməni müxalifəti və diasporunu ciddi narahat edir, çünki onlar hələ də “Böyük Ermənistan” mifindən əl çəkmək istəmirlər.
S.E. Yalçın İsveçrədəki erməni lobbisinin son təşəbbüsünə də diqqət çəkib. Onun sözlərinə görə, həmin lobbinin göstərişi ilə İsveçrə parlamentinin 19 üzvü Bern şəhərində “Qarabağ naminə sülh təşəbbüsü” adlı qondarma platformanın yaradıldığını elan ediblər.
Türkiyəli ekspert xatırladıb ki, cəmi iki ay əvvəl İsveçrə parlamentinin hər iki palatası Cənubi Qafqazla bağlı ermənipərəst bəyanatlar qəbul edib və bu, ABŞ-dakı Erməni Milli Komitəsi (ANCA) tərəfindən alqışlanıb. Buna bənzər mövqe ilə çıxış edən Beynəlxalq Xristian İttifaqı (CSI) da bu “sülh təşəbbüsü” çərçivəsində keçiriləcək tədbirlərdə iştirakçıların qeydiyyatına kömək edəcəyini bəyan edib.
“Hər fürsətdə özünü neytral dövlət kimi təqdim etməyə çalışan İsveçrə açıq qərəz və ikili standartlar nümayiş etdirir”, - deyə AVİM analitiki vurğulayıb.
Onun sözlərinə görə, Türkiyə və Türkiyə ictimaiyyəti üçün Bernin bu qərəzli mövqeyi yenilik deyil. “Ankarada 2015-ci ildə Avropa İnsan Hüquqları Məhkəməsinin qərarı ilə yekunlaşan “Perinçek – İsveçrə” işi yaxşı xatırlanır. Mövzu ermənilərlə bağlı olanda, İsveçrə hökuməti bir anda demokratiya və söz azadlığı prinsiplərini unudur”, – deyə Yalçın bildirib.
Ekspert qeyd edib ki, Bakı ilə İrəvan arasında sülh sazişi layihəsinin razılaşdırılması tərəflərin üçüncü vasitəçi tərəf olmadan da səmərəli danışıqlar apara bildiyini sübut edir. Halbuki İsveçrə və ona bənzər dövlətlər erməni diasporunun təzyiqləri ilə hərəkət edərək regionda davamlı sülhə və inkişafa heç bir töhfə vermir.
“İsveçrə parlamentindəki ermənipərəst qrupun bu cür təxribatları ilk növbədə Ermənistanın maraqlarına ziddir. Məhz İrəvan bu cür halları kəskin şəkildə pisləməlidir ki, regionda etimad mühiti güclənsin. Heç şübhəsiz, “Perinçek işi”ndə olduğu kimi, İsveçrənin ikiüzlü maskası bir daha ifşa olunacaq. Hazırda Bernin edə biləcəyi ən düzgün addım neytrallığını qorumaq və Cənubi Qafqazda sülhə mane olmamaqdır”, – deyə Selenay Erva Yalçın vurğulayıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
