Türkmənistan ədəbiyyatı guşəsi iki ölkə arasında ədəbi əməkdaşlığın yeni mərhələsinin başlanğıcını qoyur
Bakı, 14 oktyabr, AZƏRTAC
Bu gün Milli Kitabxanada açılan Türkmənistan ədəbiyyatı guşəsində qardaş Türkmənistanın mədəniyyətinə, ədəbiyyatına, tarixinə, coğrafiyasına və adət-ənənələrinə dair çox dəyərli kitablar nümayiş olunur. Bu nəşrlər zamanla Türkmənistanla maraqlanan oxucularımız üçün zəngin bir mərkəzə çevriləcək.
AZƏRTAC xəbər verir ki, bunu jurnalistlərə açıqlamasında Azərbaycan Milli Kitabxanasının direktoru Kərim Tahirov deyib.
"Biz gələcəkdə bu guşəni yeni ədəbiyyatlarla da zənginləşdirməyi planlaşdırırıq. Türkmənistan Milli Kitabxanası ilə sıx əlaqələrimiz var və onların bizə göndərəcəyi yeni kitablar da burada yer alacaq. Əminəm ki, bu guşə alimlərin, tələbələrin, tədqiqatçıların və ümumilikdə Türkmənistan mədəniyyətinə maraq göstərən hər kəsin sevimli məkanına çevriləcək", - deyə K.Tahirov diqqətə çatdırıb.
O vurğulayıb ki, Azərbaycan və Türkmənistanın yazıçıları, nəşriyyat nümayəndələri və alimləri arasında keçirilən dəyirmi masada fikir mübadiləsi aparılıb: “Bu görüşdə Azərbaycan dilinə və türkmən dilinə qarşılıqlı tərcümələrin əhəmiyyəti, bu istiqamətdə əməkdaşlığın genişləndirilməsi, həmçinin ədəbiyyat sahəsində qarşılıqlı təcrübə mübadiləsinin vacibliyi müzakirə olundu”.
Bölmənin digər xəbərləri
