Türkmənistanda Zəfər Günü qeyd edilib
Aşqabad, 9 noyabr, AZƏRTAC
Noyabrın 8-də Zəfər Günü münasibətilə Azərbaycanın Türkmənistandakı səfirliyi tərəfindən Aşqabadda tədbir keçirilib.
AZƏRTAC xəbər verir ki, diplomatik nümayəndəliklərin təmsilçilərinin, Türkmənistanda yaşayan həmvətənlərimizin və ictimaiyyət nümayəndələrinin iştirak etdikləri tədbir Azərbaycanın Dövlət Himninin səsləndirilməsi və şəhidlərin xatirəsinin bir dəqiqəlik sükutla yad olunması ilə başlayıb.
Azərbaycanın Türkmənistandakı səfiri Həsən Zeynalov bildirib ki, Zəfər Günü təkcə Azərbaycanda deyil, qəlbi ölkəmizlə döyünənlər tərəfindən bütün dünyada, xüsusilə türk aləmində təntənə ilə qeyd edilir. İkinci Qarabağ müharibəsi nəticəsində Azərbaycanın yalnız öz ərazi bütövlüyünü deyil, həm də tarixi ədaləti bərpa etdiyini deyən səfir xalqımızın bu Zəfərlə milli qürurunun və şərəfinin yenilməzliyini bir daha sübut etdiyini vurğulayıb. Diqqətə çatdırıb ki, müzəffər Azərbaycan Ordusu 44 gün ərzində Ermənistanın 30 ildə qurduğu bütün istehkamlarını, döyüş mövqelərini, eləcə də ordusunu məhv edərək tarixi Zəfər çalıb.
İkinci Qarabağ müharibəsinin xalqımızın dövlətçilik tarixinin şanlı, parlaq səhifəsi olduğunu bildirən Həsən Zeynalov Azərbaycan xalqının öz Liderinin rəhbərliyi altında bütün gücünü səfərbər edib bu şanlı missiyanı yerinə yetirdiyini bildirib.
Səfir ərazi bütövlüyümüzün bərpası uğrunda canlarından keçən şəhidlərin xatirəsinin xalqımızın yaddaşında əbədi yaşayacağını vurğulayıb.
Azərbaycanda ordu quruculuğunun, hərbi potensialın möhkəmləndirilməsinin Prezident İlham Əliyev tərəfindən başlıca vəzifə kimi müəyyən edildiyini diqqətə çatdıran səfir ötən illər ərzində Silahlı Qüvvələrimizin güclü hərbi-texniki potensialının yaradıldığını qeyd edib. Bunun üçün yalnız ən müasir silah, sursat və texnikaların alınmadığını, həm də ölkəmizin milli müdafiə sənayesinin yaradıldığını, ən əsası, hərbçilərimizin mənəvi hazırlığının və döyüş qabiliyyətinin yüksək səviyyəyə qaldırıldığı deyən H.Zeynalov İkinci Qarabağ müharibəsinin bunun əyani sübutu olduğunu bildirib.
Torpaqlarımızın işğalına, Azərbaycan xalqının öz ata-baba yurdundan məcburi köçkün düşməsinə, soyqırımına məruz qalmasına baxmayaraq, Ordumuzun haqlı müharibəsini də haqqa, ədalətə, beynəlxalq hüquqa, müharibə qanunlarına uyğun apardığını deyən səfir, əksinə, Ermənistanın Gəncə, Bərdə, Tərtər, Mingəçevir şəhərlərini, ətraf kəndləri, hərbi obyekt olmayan əraziləri raket atəşinə tutduğunu, yüzdən çox mülki insanın ölümünə səbəb olduğunu diqqətə çatdırıb.
Azad olunmuş ərazilərin işğal illərində hansı vəziyyətə salınması ilə hər kəsin mətbuatdan tanış olduğunu bildirən səfir işğalın başa çatması ilə bu torpaqlara yeni nəfəs gəlməyə bağladığını, sürətli tikinti-quruculuq işlərinin həyata keçirildiyini, yolların, hava limanlarının tikildiyini, ağıllı şəhər və kəndlərin inşasına bağlandığını diqqətə çatdırıb. Yaxın illərdə Qarabağın nəqliyyat-logistika, sənaye, kənd təsərrüfatı, turizm, mədəniyyət mərkəzinə çevriləcəyini, Qarabağın əsl simasının özünə qaytarılacağını deyən diplomat Azərbaycanın Zəfər Gününə göstərdikləri diqqətə görə tədbir iştirakçılarına təşəkkürünü bildirib.
Çıxışlardan sonra İkinci Qarabağ müharibəsi ilə bağlı hazırlanmış videoçarx nümayiş olunub.
Daha sonra Zəfər Günü münasibətilə ziyafət verilib.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
