Ukraynalı alim: Azərbaycanın öz ərazi bütövlüyünün bərpasına yönəlmiş hərəkətləri qanunidir!
Kiyev, 1 oktyabr, AZƏRTAC
Azərbaycanın öz ərazi bütövlüyünün bərpasına yönəlmiş hərəkətləri qanunidir. Dağlıq Qarabağ mübahisəli ərazi deyil. O, Azərbaycanın bütün beynəlxalq birlik tərəfindən, o cümlədən Ermənistanın özü tərəfindən də tanınmış regionlarından biridir.
Tarix elmləri namizədi Oleq Kupçik bu sözləri AZƏRTAC-a müsahibəsində söyləyib.
Onun sözlərinə görə, azərbaycanlı hərbçilər Ermənistan ərazisində vuruşmur, onun ərazisini ələ keçirməyə çalışmırlar. Bundan əlavə, Azərbaycanın Dağlıq Qarabağ bölgəsi ətrafındakı 7 rayonunun Ermənistan silahlı qüvvələri tərəfindən işğal edilməsini də unutmaq olmaz.
Tarixçi alim daha sonra deyib: “Bu gün tamamilə aydındır ki, Azərbaycanın ərazi bütövlüyünü ATƏT-in Minsk qrupunun köməyi ilə bərpa etmək üçün iyirmi beş ildən artıq müddətdə göstərilən cəhdlər özünü doğrultmayıb. İndi təqsirkarların beynəlxalq-hüquqi məsuliyyətə cəlb edilməsi, vurulmuş maddi və digər ziyanın ödənilməsi üçün Azərbaycanın Dağlıq Qarabağ bölgəsinin, habelə Ukraynanın Donetsk və Luqansk regionlarının bir hissəsinin işğalına aid sübutların sənədləşdirilməsini davam etdirmək lazımdır.
Lakin ən başlıcası, Ukrayna-Azərbaycan münasibətləri bir-birinin ərazi bütövlüyünün qarşılıqlı surətdə və ardıcıl olaraq dəstəklənməsinə əsaslanır”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
