UKRAYNANIN AZƏRBAYCANA OLAN MÜNASİBƏTİ HEÇ ZAMAN DƏYİŞMƏYƏCƏK
Qonağı səmimi salamlayan Murtuz Ələsgərov Azərbaycan ilə dost Ukrayna arasında əlaqələrin genişlənməsində səfir Boris Aleksenkonun rolunu yüksək qiymətləndirmişdir. Milli Məclisin sədri demişdir ki, təməli ümummilli liderimiz Heydər Əliyev tərəfindən qoyulmuş Azərbaycan-Ukrayna dostluğu bu gün strateji tərəfdaşlıq səviyyəsinə qədər yüksəlmişdir. Azərbaycan Prezidenti İlham Əliyevin bu yaxınlarda Ukraynaya səfəri zamanı aparılan danışıqlardan sonra münasibətlərimiz daha da dərinləşməyə başlamışdır. Parlamentlərarası əlaqələri yüksək qiymətləndirən Murtuz Ələsgərov bu sahədə də müəyyən nailiyyətlərin əldə olunduğunu diqqətə çatdırmış, Ermənistan-Azərbaycan, Dağlıq Qarabağ münaqişəsinin həllində göstərdiyi dəstəyə görə Ukrayna dövlətinə və xalqına minnətdarlığını bildirmişdir.
Murtuz Ələsgərov səfir Boris Aleksenkonun bundan sonrakı fəaliyyətində də Azərbaycanla əlaqələrini kəsməyəcəyinə və münasibətlərimizin daha da genişlənməsinə çalışacağına ümidvar olduğu vurğulamışdır.
Səmimi qəbul və xoş sözlər üçün minnətdarlıq edən Boris Aleksenko demişdir ki, həqiqətən də ölkələrimiz arasında əlaqələrin təməli ulu öndər Heydər Əliyev tərəfindən qoyulmuşdur. Heydər Əliyev Azərbaycanı blokadadan çıxarmaq, dünyaya tanıtmaqla yanaşı, Ukrayna xalqına da böyük kömək göstərmişdir və onun xalqı bu yaxşılığı heç zaman unutmayacaq.
Diplomat demişdir ki, bu il oktyabrın 31-də Ukraynada prezident seçkiləri keçiriləcək və namizədlərdən kimin qələbə çalmasından asılı olmayaraq Azərbaycana münasibət olduğu kimi qalacaqdır. Rəsmi Kiyevin, eləcə də sadə xalqın Dağlıq Qarabağ münaqişəsinin Azərbaycanın ərazi bütövlüyü çərçivəsində həlli ilə bağlı mövqeyi də dəyişməyəcək.
Boris Aleksenko Azərbaycan Prezidenti tərəfindən ona verilmiş yüksək mükafata - “Şöhrət” ordeninə görə dərin minnətdarlığını bildirmişdir. Sonra diplomat demişdir ki, Kiyev Dövlət Universitetinin kollektivi ölkələrimiz arasında, xüsusən də parlamentlərarası əlaqələrin inkişafındakı roluna görə Murtuz Ələsgərovu universitetin Fəxri doktoru adına layiq görmüşdür. Bu mükafat ona Ukraynaya səfəri zamanı təntənəli surətdə təqdim olunacaqdır.
Görüşdə qarşılıqlı maraq doğuran digər məsələlər ətrafında da fikir mübadiləsi aparılmışdır.
