AZƏRTAC xəbər verir ki, istedadlı skripkaçı Ceyhun İsmayılovun Latviyanın paytaxtı Riqada, Dövlət Filarmoniyasının böyük konsert salonunda ölkənin tanınmış musiqi kollektivləri ilə birlikdə ümummilli liderimiz Heydər Əliyevin xatirəsinə həsr olunmuş konsert vermişdir. Latviya Dövlət Simfonik Orkestrinin müşayiəti ilə əvvəlcə mahir skripkaçının ulu öndərə həsr etdiyi 4-cü rekviyem səslənmişdir. Konsert zamanı Ceyhunun mahir ifasında “Sarı gəlin” xalq mahnısının səslənməsi tamaşıçıları məftun etmişdir. Avropada yaxşı tanınan “Nebesa” qrupunun çıxışları konserti daha da canlandırmışdır. Konsert Baltikyanı ölkələrdə ən çox baxılan “Birinci Baltik” televiziya kanalı ilə yayımlanmışdır.
Məşhur pianoçu və bəstəkar Raymond Pauls və başqaları keçirilən mətbuat konfransında Ceyhunun ifasını yüksək qiymətləndirmişlər. Latviyanın aparıcı qəzetləri və telekanalları konsertə geniş yazılar, verilişlər həsr etmişlər. Bu ölkənin “İstedadlara kömək” Fondu azərbaycanlı ifaçını xüsusi mükafata layiq görmüşdür.
Konsert proqramının payızda Heydər Əliyev adına Sarayda təkrar verilməsi qərara alınmışdır.
