UŞAQ RƏSM MÜSABİQƏSİNƏ YEKUN VURULMUŞDUR
BMT-nin Əhali Fondunun və “Abşeron” rəsm qalereyasının təşkilatçılığı ilə keçirilən müsabiqəyə 6-17 yaşlı 81 uşaq və yeniyetmənin 140-a yaxın əl işi təqdim olunmuşdur.
Münsiflər heyəti qalibləri üç yaş qrupunda müəyyənləşdirmişdir. Bundan əlavə istisna hal kimi sərgidə 6 nəfər 5 yaşlı uşağın da rəsmləri nümayiş etdirilmiş və onlardan ikisi həvəsləndirici mükafata layiq görülmüşlər.
Yaş qruplarında ilk üç yeri tutan qaliblərə diplom və xatirə hədiyyələri təqdim olunmuşdur.
Qalereyanın direktoru Eldəniz İbrahimov, Rəssamlar ittifaqının katibi Ağəli İbrahimov uşaq və yeniyetmələr arasında təsviri sənətə meylin gücləndirilməsində belə tədbirlərin əhəmiyyətini vurğulamış, qalibləri təbrik etmişlər.
