USTAD ŞƏHRİYARIN 100 İLLİK YUBİLEYİ BERLİNDƏ QEYD OLUNMUŞDUR

23.02.2004 [21:37]
Çap et
A⁺ A^-

AZƏRTAC-ın Almaniyadakı xüsusi müxbiri xəbər verir ki, fevralın 22-də Berlinin “Mədəniyyətlərin qovşağı” sarayında dahi Azərbaycan şairi və mütəfəkkiri, ustad Şəhriyarın 100 illiyinə həsr olunmuş musiqili ədəbi-bədii tədbir keçirilmişdir. Azərbaycan və alman mədəniyyətlərini, ədəbiyyatını həmişə dialoqa cəlb edən “VVort virus” klubunun təsisçiləri və fəalları həmyerlimiz Məhəmməd Pəlahəngi və alman alimi, bədii söz ustası Mark Qoldberqin birgə səyləri nəticəsində təşkil olunmuş yubiley gecəsində Berlinin elm, ədəbiyyat və incəsənət xadimləri, ictimaiyyətin nümayəndələri, Almaniyadakı Azərbaycan səfirliyinin əməkdaşları, Azərbaycan icmalarının nümayəndələri iştirak etmişlər.

Gecəni giriş sözü ilə açan Azərbaycan poeziyasının vurğunu, ədəbiyyat tədqiqatçısı türk xanım Dilək XX əsr Azərbaycan ədəbiyyatının klassiklərindən olan ustad Şəhriyarın zəngin bədii yaradıcılığından, şərəfli, təzadlı və ibrətamiz ömür yolundan danışmışdır.

Sonra söz şerə və musiqiyə verilmişdir. Məhəmməd Pəlahənginin Azərbaycan musiqisinin həzin sədaları altında oxuduğu “Heydər baba...” ilə başlayan bədii hissədə Şəhriyar şerləri bədii söz ustası Mark Qoldberqin ifasında alman dilində sənətkarlıqla səsləndirildi.

Dahi şairin 100 illik yubileyinə layiqli töhfə olan bu ədəbi-bədii tədbirin musiqi tərtibatını Bakıdakı 2 nömrəli musiqi məktəbinin məzunu, hazırda Berlin gimnaziyasının 11-ci sinif şagirdi Əfşan Pəlahəngi və Marsel Peterson vermişlər.

Berlinin “Azad Televiziya İstehsalçıları Birliyi” gecədə çəkilişlər aparmışdır.