Üzeyir Hacıbəylinin anadan olmasının 140 illiyi çərçivəsində kitabxanada silsilə materialların hazırlanması davam edir
Bakı, 14 oktyabr, AZƏRTAC
Bu il Azərbaycan bəstəkarı, Şərqdə ilk operanın yaradıcısı, böyük musiqişünas-alim, istedadlı publisist, dramaturq və pedaqoq, tanınmış ictimai xadim, Xalq artisti, Dövlət mükafatları laureatı, Azərbaycan Elmlər Akademiyasının həqiqi üzvü Üzeyir Hacıbəylinin anadan olmasının 140 ili tamam olur. Prezident İlham Əliyevin dahi bəstəkarın 140 illik yubileyinin keçirilməsinə dair imzaladığı Sərəncamdan irəli gələn tədbirləri həyata keçirmək məqsədilə Cəfər Cabbarlı adına Respublika Gənclər Kitabxanasında mütəmadi olaraq materiallar hazırlanır.
Kitabxanadan AZƏRTAC-a bildirilib ki, istifadəçilərə təqdim edilən növbəti materiallar kitabxananın rəsmi saytında yer alan videomaterial və təqvimdir. “Üzeyir Hacıbəyli 140” adlı təqvimdə “İlk mədəniyyət nümunələrinin yaradıcısı” başlığı altında bəstəkarın həyat və fəaliyyəti haqqında məlumat, bir sıra görkəmli şəxslərin onun haqqında söylədikləri dəyərli fikirlər, rəsmi sənədlərin tam mətni yer alır. Təqvimdə dahi bəstəkarın layiq görüldüyü orden, mükafat və fəxri adlarla yanaşı, müəllifi olduğu operaları, musiqili komediyaları, instrumental müşayiətli xor əsərləri haqqında da məlumat verilir. Kitabxana əməkdaşları tərəfindən hazırlanan materialda “Musiqi dühası”, “Milli Musiqi Günü və Beynəlxalq Musiqi Festivalı”, “Tələbələr”, “Xatirəsinin əbədiləşdirilməsi” kimi bölmələr də sərgilənir.
“Üzeyir Hacıbəyli 140” adlı təqvim kitabxananın rəsmi saytında yerləşdirilib.
Kitabxanada dahi bəstəkarın 140 illik yubileyi münasibətilə "Musiqi dühası Üzeyir Hacıbəyli" adlı videomaterial da hazırlanıb. Materialda Ulu Öndər Heydər Əliyevin Üzeyir bəy haqqında söylədiyi dəyərli fikirlər, Azərbaycan Respublikasının Prezidenti İlham Əliyevin Şuşada bəstəkarın büstü qarşısında söylədiyi tarixi çıxışın videogörüntüləri təqdim edilir. Kitabxananın rəsmi saytında yerləşdirilən materialda Üzeyir bəyin dünya musiqisi tarixində tutduğu mövqedən, musiqi mədəniyyətimizin inkişafındakı misilsiz xidmətlərindən, Azərbaycan xalq musiqisinin nota salınaraq elmi əsaslarla tədqiq edilməsindən, 1908-ci ildə səhnəyə qoyulan “Leyli və Məcnun” operası ilə ölkəmizdə professional bəstəkarlıq məktəbinin, müsəlman Şərqində isə opera sənətinin əsasının qoyulmasından bəhs edilir.
Bölmənin digər xəbərləri
