VAŞİNQTONDA “PANDAMANİYA” LAYİHƏSİ
Əslində, pandalar çoxdan Vaşinqtonun sevimli sakinlərinə çevriliblər. 1972-ci ildə Çin hökuməti ABŞ Milli Zooparkına ilk dəfə Linq-Linq və Hsinq-Hsinq adlı iki ağ-qara rəngli ayı hədiyyə etmişdir. O vaxtdan bəri həm paytaxt sakinləri, həm də buraya gələn turistlər bu heyvanlara böyük rəğbət bəsləyirlər.
“Pandamaniya” layihəsinin ayıları isə minbir rəngdədir. Zooparkdakı qohumlarına onlar yalnız böyüklüyü və gözlərinin ətrafındakı ənənəvi qara “eynəkləri” ilə bənzəyirlər. Hər heykəlin müəllifi əsərini bir mövzuya həsr etmişdir. Küçələrdə ayaq üstdə və ya oturmuş vəziyyətdə qoyulmuş ayı heykəlləri arasında siyasətçi, musiqiçi, hətta centlmen geyimində təsvir edilənlərə də rast gəlmək olur. Hərə öz sevimli pandasını seçib qarşısında şəkil çəkdirir və yaxud, sadəcə, durub maraqla ona tamaşa edir.
Amma təəssüf ki, hamı pandalara eyni müsbət münasibət bəsləmir. Hər yerdə olduğu kimi, Vaşinqtonda da cahillər vardır. Belə ki, heykəllər quraşdırıldığı ilk gündən onlara hücumlar olur. 150 pandadan ən azı 7-nin bir hissəsi dağıdılıb, sifətləri eybəcər hala salınıbdır. Bu hadisələr şəhərin təhlükəsizlik kameralarında qeydə alınmışdır.
Kolumbiya federal dairəsinin rəsmiləri bildirirlər ki, pandalardan qoparılan hissələr heykəllərin müəllifləri tərəfindən yenidən düzəldilir. Lakin onların bərpası üçün oktyabrdakı hərracı gözləyəcəklər. Çünki heykəllərə yenidən hücum edilməyəcəyinə təminat yoxdur.
Bunula yanaşı, «Pandamaniya» layihəsinin sponsorları inanırlar ki, paytaxt sakinləri və qonaqlar məzəli ayılardan yalnız xoş təəssüratlar alacaqlar.
