Venesuelanın “PDVSA” şirkəti “ConocoPhillips”ə 2 milyard dollar ödəyəcək
Bakı, 21 avqust, AZƏRTAC
ABŞ-ın enerji nəhəngi “ConocoPhillips” şirkəti Venesuelanın “PDVSA” (“Petroleos de Venesuela”) neft şirkəti ilə 2 milyard dollarlıq razılıq sazişi imzalayıb.
AZƏRTAC “ConocoPhillips”ə istinadla xəbər verir ki, “PDVSA” 90 gün ərzində 500 milyon dollaradək ilkin ödəmə həyata keçirəcək.
Beynəlxalq Ticarət Palatasının (ICC) qərarına əsasən, “ConocoPhillips” şirkəti 2 milyard dollarıq məbləği hər üç aydan bir olmaqla alacaq.
“Bu məbləğ 2007-ci ildə “ConocoPhillips”in Venesueladakı “Hamaca” və “Petrozuata” xam neft layihələrinin qanunsuz özəlləşdirilməsi və digər özəlləşdirmə tədbirlərinə görə veriləcək”, - deyə şirkət bildirib.
Xatırladaq ki, Beynəlxalq Ticarət Palatası aprel ayında “ConocoPhillips” lehinə qərar verib, lakin şirkət “PDVSA”dan ödəniş ala bilməyib. Sonrakı ay “ConocoPhillips” “PDVSA”nın Karib adalarındakı neft emalı zavodlarının məhsullarını mənimsəyib.
2007-ci ildə Venesuelanın sabiq Prezidenti Huqo Çavez “ConocoPhillips”in bu ölkədəki iki birgə müəssisəsini müsadirə etmişdi.
Bölmənin digər xəbərləri
