Veteran futbolçu: “Neftçi”də irəliləyiş var, “Zirə” qələbə qazana bilmir
Bakı, 6 fevral, AZƏRTAC
“Bu mövsüm Azərbaycan çempionatı çox gərgin və maraqlı keçir. Bütün komandalar meydanda sonadək mübarizə aparırlar”.
Bu sözləri AZƏRTAC-a açıqlamasında veteran futbolçu Əfran İsmayılov Azərbaycan Premyer Liqasının XXI turunun oyunlarını şərh edərkən deyib.
O, “Səbail” - “Qarabağ” (1:2) oyununda Ağdam təmsilçisinin layiqli qələbə qazandığını bildirib: “Qurban Qurbanov bu oyuna fərqli heyətlə çıxsa da, komandası qalib gəlməyi bacardı. “Səbail” də sonadək döyüşdü. Lakin rəqib “Qarabağ” olduğu üçün qələbə qazanmaq çətin idi. Heç kim bu məğlubiyyətə görə Şahin Diniyevin komandasını qınaya bilməz”.
Onun sözlərinə görə, “Sabah” - “Turan Tovuz” matçında qeydə alınan 1:1 hesablı heç-heçə ədalətli nəticədir: “Murad Musayevin istefasından sonra Bakı klubunu meydana idman direktoru İqor Ponomaryov çıxarmışdı. Hətta heyətdə bəzi dəyişikliklər də etmişdi. “Turan Tovuz” da yaxşı formadadır. Düşünürəm ki, meydanda bərabər səviyyəli oyun getdi”.
Azərbaycan millisinin və “Qarabağ”ın sabiq üzvü “Sumqayıt” - “Neftçi” görüşündə (2:1) qonaqların məğlubiyyətinin gözlənilməz olduğunu söyləyib: “Meydan sahibləri rəqibini yenilənmiş stadionda qəbul etdi. Çox sevindirici haldır ki, ölkəmizdə bu cür arenalar inşa olunur. Oyuna gəlincə, Samir Abasovun başçılıq etdiyi kollektiv son turlar yaxşı formadadır. “Neftçi” ilə qarşılaşmada da bunu sübut etdilər. Paytaxt təmsilçisində isə baş məşqçi dəyişikliyindən sonra irəliləyiş var. Son oyun istisna olmaqla, “ağ-qaralar” artıq meydanda daha aqressiv mübarizə aparırlar”.
“Qəbələ” - “Zirə” matçını (1:1) da dəyərləndirən keçmiş yarımmüdafiəçi bölgə təmsilçisi ilə səfər oyunlarının istənilən komanda üçün çətin keçdiyini vurğulayıb: “Qəbələ” yaxşı formada olmayanda belə doğma meydanda rəqiblərinə qarşı çox ciddi mübarizə aparır. Həqiqətən bu komandaya və göstərdiyi oyuna rəğbətim var. Problem futbolçuların əllərinə düşən fürsətdən istifadə edə bilməməsidir. “Zirə”nin taleyi isə öz əlində idi. Mövsümə uğurlu başlamışdılar. Amma indi qələbə qazanmaqda çətinlik çəkirlər. Rəşad Sadıqovun oyun üslubu yaxşıdır. Komanda qol vurmaqla bağlı problem yaşayır. Bilirsiniz ki, Azərbaycan futbolunda hücumçu problemi var. “Qarabağ” legioner hücumçuların hesabına rəqiblərini məyus edə bilir. Lakin digər klublarda bu cür imkanlar yoxdur”.
Son olaraq “Kəpəz” - “Araz-Naxçıvan” oyunu (3:1) barədə danışan Ə.İsmayılov Gəncə təmsilçisinin yeni baş məşqçi Adil Şükürovun rəhbərliyi altında fərqli mübarizə apardığını qeyd edib: “Düzdür, “Kəpəz”in hazırkı heyətini Azər Məmmədov qurmuşdu. Məncə, Azər müəllim gəncəli futbolsevərlərin təzyiqindən sonra istefa verdi. Onun əvəzinə gələn Adil Şükürov isə çox uğurlu qrafik cızır. Heyətindəki gənc oyunçular dinamik mübarizə aparırlar. Hazırda çalışdığım “Araz-Naxçıvan”a gəlincə, mövsümə yaxşı başlasaq da, sonradan eniş yasandı. Düşünürəm ki, buna arxayınlıq səbəb oldu. Komandamız “Kəpəz”lə də görüşə rahat çıxmışdı. Buna görə də meydandan xalsız ayrıldıq. Gələcəkdə hər şeyin daha yaxşı olacağına inanıram”.
Bölmənin digər xəbərləri
