Volodimir Zelenski hərbi xərclərin 7,7 milyard dollar artırılmasını təsdiqləyib
Bakı, 22 oktyabr, AZƏRTAC
Volodimir Zelenski Ali Rada tərəfindən bu il üçün dövlət büdcəsi haqqında qanuna təsdiqlənmiş dəyişiklikləri imzalayıb. Dəyişikliklər hərbi xərclərin 325 milyard qrivna (7,7 milyard dollar) artırılmasını nəzərdə tutur.
AZƏRTAC TASS agentliyinə istinadla xəbər verir ki, Kiyev bu məbləğin 292 milyard qrivnasının (təxminən 7 milyard dollar) dondurulmuş Rusiya aktivlərindən əldə ediləcək gəlirlər hesabına qarşılanacağını gözləyir. Bu vəsaitin böyük hissəsi, yəni təxminən 5 milyard dollar Ukrayna Silahlı Qüvvələrinin ehtiyaclarına, 2,3 milyard dollar isə silah-sursatın alınması və istehsalına yönəldiləcək.
Əvvəlcə Ukraynanın 2025-ci il üçün dövlət büdcəsində hərbi xərclər 2,22 trilyon qrivna (52,7 milyard dollar) məbləğində nəzərdə tutulmuşdu. Yayda Rada bu məbləği əlavə olaraq 412 milyard qrivna (9,87 milyard dollar) artırmışdı. Hazırkı artımdan sonra büdcənin hərbi xərcləri 2,95 trilyon qrivnaya (70,67 milyard dollar) çatacaq.
Ali Radanın Büdcə Komitəsinin sədri Roksolana Pidlasa bildirib ki, Ukrayna ÜDM-in 31 faizini hərbi məqsədlərə sərf edir.
Bölmənin digər xəbərləri
