Vyana yaxınlığında qatar toqquşmasında 28 nəfər xəsarət alıb
Vyana, 22 dekabr, AZƏRTAC
Dekabrın 22-də axşam saatlarında Avstriyanın Kritzendorf yaşayış məntəqəsində iki sərnişin qatarı toqquşub. İlkin məlumatlara görə, qəza nəticəsində 28 sərnişin müxtəlif dərəcəli bədən xəsarəti alıb.
Elektrik qatarının sərnişin qatarı ilə toqquşması zamanı iki vaqon relsdən çıxaraq aşıb, bir vaqon isə maili vəziyyətdə relslərin üzərinə əyilib. Aşan vaqonlardakı sərnişinlərin təxliyəsindən sonra əraziyə cəlb edilən iki təcili yardım vertolyotu və həmçinin çoxlu sayda təcili yardım maşını yaralıları yaxın ərazilərdəki xəstəxanalara çatdırıb.
Paytaxt Vyanadan 20 kilometr şimalda baş verən qəza nəticəsində həmin istiqamətdəki dəmir yolu xətti bağlanılıb, qatarların yerinə əvəzedici xidmət üçün avtobuslar xəttə buraxılıb. Baş vermiş qəzanın səbəbləri araşdırılır.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
