Vyanada Üzeyir Hacıbəylinin 140 illiyinə həsr olunmuş beynəlxalq müsabiqə uğurla başa çatıb
Vyana, 8 sentyabr, AZƏRTAC
Azərbaycanın klassik musiqisini Avropada tanıtmaq məqsədi daşıyan II “Sounds of the Land of Fire” Beynəlxalq Musiqi Müsabiqəsi Vyanada uğurla başa çatıb. Bu möhtəşəm layihə Azərbaycan klassik musiqisinin banisi, bütün Şərqdə ilk operanın müəllifi Üzeyir Hacıbəylinin 140 illik yubileyinə həsr olunub.
AZƏRTAC xəbər verir ki, müsabiqənin final mərhələsi və laureatların qala-konserti Vyana şəhərinin mərkəzində yerləşən Fortepiano Qalereyasının İmperator zalında və Azərbaycan Mədəniyyət Mərkəzində keçirilib.
Müsabiqənin təşkilatçısı və baş sponsoru 2002-ci ildə Avstriyada təsis edilən və hazırda Sahilə Rzazadənin rəhbərlik etdiyi Azərbaycan Akademik Birliyidir. İyirmi ildən artıq müddətdir ki, bu birlik Avstriya və Azərbaycan arasında elmi və mədəni əlaqələrin möhkəmlənməsinə xidmət edir. Müsabiqənin digər sponsoru Azərbaycan Respublikasının Diasporla İş üzrə Dövlət Komitəsi, tərəfdaşı isə Vyanadakı Azərbaycan Mədəniyyət Mərkəzi olub.
Müsabiqənin təntənəli açılışında Vyanadakı Azərbaycan Mədəniyyət Mərkəzinin direktoru Leyla Qasımova və Azərbaycan Akademik Birliyinin rəhbəri Sahilə Rzazadə çıxış ediblər. Leyla Qasımova çıxışında bildirib ki, Mədəniyyət Mərkəzi bu mötəbər tədbirin qala-konsertinə ev sahibliyi etməkdən qürur duyur. O, yarışmanın artıq ikinci dəfə keçirilməsindən və dahi bəstəkar Üzeyir Hacıbəylinin 140 illiyinə həsr olunmasından məmnunluq duyduğunu ifadə edərək, təşkilatçılara, münsiflər heyətinə və iştirakçılara uğurlar arzulayıb. Sahilə Rzazadə çıxışında münsiflər heyətinə, sponsorlara, tərəfdaşlara və xüsusilə də öz komandasına dərin təşəkkürünü bildirib. O, iştirakçıların həm istedadlı, həm də cəsarətli olduqlarını vurğulayıb.
Rəsmi çıxışlardan sonra qonaqlara 2022-ci ildə keçirilmiş birinci müsabiqənin tarixini, layihənin missiyasını, məqsədlərini, mükafatlarını və finalçılarını əks etdirən video təqdim olunub. Videodakı klassik musiqi ilə süni intellekt texnologiyalarının vəhdəti xüsusi maraq doğuran yaradıcı yanaşma kimi yadda qalıb.
Üzeyir Hacıbəyli adına Bakı Musiqi Akademiyasının rektoru, Xalq artisti, professor Fərhad Bədəlbəyli münsiflər heyətinin sədri qismində çıxışında müsabiqənin əhəmiyyətini vurğulayıb, daha sonra münsiflər heyətinin üzvləri və Sahilə Rzazadə ilə birlikdə laureatlara diplom və mükafatlar təqdim edib.
Xüsusilə vurğulanmalıdır ki, müsabiqənin bu qəbildən olan digər yarışmalardan əsas fərqləndirici xüsusiyyəti Azərbaycan bəstəkarlarının əsərlərinin ifasının əsas şərtlərdən biri olmasıdır. Müxtəlif ölkələrdən finala vəsiqə qazanmış gənc pianoçular ilk dəfə olaraq Qara Qarayev, Cövdət Hacıyev, Əşrəf Abbasov, Tofiq Quliyev, Qalib Məmmədov, Fərhad Bədəlbəyli və digər müəlliflərin zəngin irsinə müraciət ediblər. Bu layihə çərçivəsində dünya musiqi ictimaiyyətini Azərbaycan mədəniyyətinə daha da yaxınlaşdırmaq missiyası tam şəkildə həyata keçirilib.
Müsabiqənin nəticələrinə əsasən, Eunseon Ahn (Cənubi Koreya) birinci yer, Nanase Kuroki (Yaponiya) və Naoe Sasaki (Yaponiya) ikinci yer, Hidayət Sadıqbəyli (Azərbaycan) və Tomiris Bekturova (Qazaxıstan) üçüncü yerə layiq görülüblər.
Azərbaycan bəstəkarlarının əsərlərinin ən yaxşı ifasına görə Daniel Boura (Çexiya) xüsusi mükafatla təltif edilib. O, Əşrəf Abbasovun “Folk Song (6 Miniatures)” və “Humoreska” əsərlərini, həmçinin Cövdət Hacıyevin “Joke” və “Fairy Tale” əsərlərini yüksək peşəkarlıqla səsləndirib.
Münsiflər heyətində Xalq artisti Fərhad Bədəlbəyli (fəxri sədr) ilə yanaşı, Milan və Linz konservatoriyalarının professoru, Bakıda doğulmuş Oleq Marşev, Vyana Rixard Vaqner Konservatoriyasının professoru Ştefan Möller, pianoçu və bəstəkar Abuzər Manafzadə, pianoçu Kamalə Əhmədova və musiqişünas, pedaqoq, Vyanadakı “Musiqi sevinc gətirir” məktəbinin rəhbəri Fərəh Tahirova yer alıblar.
Yaxın gələcəkdə qaliblərin Azərbaycan Respublikasının Mədəniyyət Nazirliyi, Üzeyir Hacıbəyli adına Bakı Musiqi Akademiyası və Vyanadakı Azərbaycan Mədəniyyət Mərkəzinin dəstəyi ilə ölkənin aparıcı orkestrləri ilə birgə konserti nəzərdə tutulur.
Münsiflərin fikrincə, müsabiqə yeni istedadların ortaya çıxarılması üçün əsl kəşf xarakteri daşıyıb. İştirakçıların hazırlıq səviyyəsi və peşəkarlıq dərəcəsi çox yüksək olub. Azərbaycan musiqisinin ifası isə bir çoxları üçün ilk dəfə olmaqla yanaşı, böyük maraq və dərin emosional təsir yaradıb.
Qeyd edilməlidir ki, “Sounds of the Land of Fire” artıq Avropanın mədəni həyatında öz layiqli yerini tutmuş və Azərbaycan musiqisinin xaricdə tanıdılmasının parlaq bir səhifəsinə çevrilmişdir. Bu genişmiqyaslı layihənin hazırlanması və həyata keçirilməsi üzərində təxminən bir il ərzində çalışan Sahilə Rzazadə (rəhbər və layihə direktoru), Abuzər Manafzadə (müsabiqənin məsləhətçisi), Sabina Rzazadə (incəsənət üzrə məsləhətçi), Ramazan Nəbiyev (müavin və informasiya texnologiyaları üzrə məsləhətçi), Elçin Bağırov (maliyyə məsləhətçisi) və Raul Məmmədzadədən (mədəni təşkilatlarla əməkdaşlıq üzrə köməkçi) ibarət komandanın xüsusi əməyi qeyd olunmalıdır.
Müsabiqə haqqında daha ətraflı məlumatı müsabiqənin rəsmi saytından əldə etmək mümkündür - www.lofmc.com.
Bölmənin digər xəbərləri
