Vyanada Zəfər Günü münasibətilə rəsmi qəbul keçirilib VİDEO
Vyana, 10 noyabr, AZƏRTAC
Noyabrın 9-da Vyanada yerləşən Lixtenşteyn sarayında Zəfər Gününə həsr edilmiş rəsmi qəbul keçirilib.
AZƏRTAC xəbər verir ki, Azərbaycanın Avstriyadakı səfirliyi, Diasporla İş üzrə Dövlət Komitəsi və Azərbaycan Mədəniyyət Mərkəzinin birgə təşkil etdiyi tədbirdə Avstriyanın dövlət və hökumət rəsmiləri, parlament üzvləri, Vyanada akkreditə olunmuş diplomatik korpusun, BMT bölməsinin və digər beynəlxalq təşkilatların təmsilçiləri, Azərbaycanın Avstriyadakı fəxri konsulları, Avstriya işgüzar dairələrinin nümayəndələri, bu ölkədə yaşayan soydaşlarımız iştirak ediblər.
Azərbaycanın Avstriyadakı səfiri Rövşən Sadıqbəyli tədbiri giriş sözü ilə açıb. Qeyd edilib ki, bu il Azərbaycan xalqı üçün xüsusi ildir, çünki bu günlərdə Azərbaycan tarixinin mühüm mərhələlərinin ildönümüdür.
Səfir bildirib ki, oktyabrın 18-də Azərbaycanın müstəqilliyinin bərpasının 30-cu ildönümünü təntənəli şəkildə bayram edilib. Son üç onillikdə Azərbaycan öz inkişaf yolunda böyük irəliləyişlər əldə edib, bu gün ölkəmiz çoxşaxəli iqtisadiyyatı və dinamik siyasi sistemi ilə tarixdə heç vaxt olmadığı qədər güclüdür. Azərbaycan öz coğrafiyasında və beynəlxalq aləmdə mühüm rol oynayır.
R.Sadıqbəyli qeyd edib ki, noyabrın 8-də Ali Baş Komandan İlham Əliyevin rəhbərliyi ilə şanlı Ordumuz Qarabağın mirvarisi, Azərbaycanın mədəniyyət paytaxtı Şuşanın 28 illik işğaldan sonra azad edib və Azərbaycanda bu əlamətdar tarixi hadisənin birinci ildönümü böyük təntənə ilə bayram edilib: “Bu, əsl Vətən müharibəsi idi, çünki bu, mənim ölkəmin 20 faiz ərazisinin işğaldan azad edilməsi, suverenliyinin, ərazi bütövlüyünün və birliyinin bərpası uğrunda mübarizə idi”.
Qeyd edilib ki, noyabrın 10-da Azərbaycan, Ermənistan və Rusiya liderləri tərəfindən otuz ilə yaxındır davam edən münaqişəyə son qoyan və regiona çoxdan gözlənilən sülhü gətirən üçtərəfli Bəyanatın imzalanmasının birinci ili də tamam olur. Bu sülhün əldə olunması və əmin-amanlıq içində yaşaya bilmək üçün Azərbaycan xalqı canlarından keçmiş soydaşlarımızın şücaətini və fədakarlığını həmişə xatırlayacaq və ehtiramla anacaqdır.
Səfir diqqətə çatdırıb ki, rəsmi qəbulun bədii hissəsində tanınmış dirijor, professor, Xalq artisti, Əməkdar incəsənət xadimi Yalçın Adıgözəlovun dirijorluğu ilə Azərbaycan və Avropa klassik musiqisindən gözəl parçalardan ibarət konsert ifa olunacaq: “Onu da qeyd edim ki, Yalçın Adıgözəlov üçüncü nəsil qarabağlı musiqiçi və Azərbaycanın məşhur ənənəvi musiqi janrı olan muğam sənətinin tanınmış simalarından biri - xanəndə Zülfüqar Adıgözəlovun nəvəsidir. “Qafqaz Konservatoriyası” adı ilə tanınan Şuşa musiqi mədəniyyətinə bu gecə şedevrlərindən zövq alacağımız onlarla istedadlı musiqiçi və müğənnilər bəxş edib”.
R.Sadıqbəyli tədbirin baş tutmasında göstərilən dəstəyə görə Vyanadakı Azərbaycan Mədəniyyət Mərkəzi və Diasporla İş üzrə Dövlət Komitəsinə təşəkkür edib.
Çıxışdan sonra Vyana Kamera Orkestri Y.Adıgözəlovun dirijorluğu ilə Azərbaycan və Avstriya bəstəkarlarının əsərlərindən ibarət konsert proqramı ilə çıxış edib. Konsertdə Azərbaycan bəstəkarları Üzeyir Hacıbəyli, Fikrət Əmirov, Qara Qarayev, Asəf Zeynallı, Niyazi, Vasif Adıgözəlov, Cahangir Cahangirov, Fərhad Bədəlbəyli və digərlərinin əsərləri ifa olunub. Beynəlxalq müsabiqələr laureatları Selcan Nəsibli və Orxan Cəlilov milli-vətənpərvərlik ruhunda olan əsərləri yüksək peşəkarlıqla səsləndiriblər. Əməkdar artist Əliağa Sədiyevin tarda orkestrin müşayiəti ilə ifadə etdiyi “Çahargah“ rapsodiyası, “Qərənfil” və “Muğamsayağı“ əsərləri tamaşaçılar tərəfindən böyük maraq və alqışlarla qarşılanıb.
Qarabağ torpaqlarının azad edilməsi uğrunda xalqımızın apardığı qəhrəmanlıq mübarizəsinin və təntənəli qələbəsinin ruhuna uyğun olaraq konsert Qara Qarayevin “İldırımlı yollarla” baletindən bir parçanın sədaları altında başa çatıb.
Konsertdən sonra qonaqlar ziyafətə dəvət ediliblər.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
