REGİONLAR
Xocalı faciəsi dinc əhaliyə qarşı törədilən soyqırımı cinayətlərinin ən dəhşətlisidir
Şəki, 25 fevral, Mustafa Dadaşov, AZƏRTAC
İnsanlığa qarşı ən böyük cinayətlərdən olan Xocalı soyqırımından 31 il ötür. Bu qanlı faciənin ildönümü ilə əlaqədar Şəkinin idarə, müəssisə və təşkilatlarında, təhsil müəssisələrində silsilə tədbirlər davam edir.
AZƏRTAC-ın bölgə müxbiri xəbər verir ki, Şəki Heydər Əliyev Mərkəzində Xocalı soyqırımının ildönümü ilə əlaqədar tədbir keçirilib. Şəki Şəhər İcra Hakimiyyətinin və Mərkəzin birgə təşkilatçılığı ilə keçirilən tədbirin iştirakçıları əvvəlcə Xocalı soyqırımına həsr olunmuş fotosərgi ilə tanış olublar. Martin 1-dək davam edəcək sərgidə Xocalı şəhərində törədilən amansız və qəddar soyqırımı, erməni vandalizmini və vəhşiliyini əks etdirən fotoşəkillər sərgilənir.
Anım tədbirinin əvvəlində torpaqlarımızın işğaldan azad edilməsi uğrunda canlarını qurban vermiş qəhrəman Vətən oğullarının və Xocalı şəhidlərinin xatirəsi bir dəqiqəlik sükutla yad olunub.
Tədbirdə Xocalı faciəsinin insanlığa, dinc əhaliyə qarşı törədilən dəhşətli cinayət olduğu, bu soyqırımı nəticəsində 613 nəfərin həyatına son qoyulduğu, 1275 dinc sakinin əsir götürüldüyü, 150 nəfər itkin düşdüyü diqqətə çatdırılıb.
Vurğulanıb ki, Xocalı soyqırımına yalnız Ümummilli Lider Heydər Əliyevin təşəbbüsü və diqqəti sayəsində hüquqi-siyasi qiymət verilib. Bu gün Xocalı soyqırımı ilə bağlı həqiqətlərin beynəlxalq aləmdə təbliği və günahkarların öz cəzasını alması istiqamətində Azərbaycan Prezidenti İlham Əliyevin və Birinci vitse-prezident Mehriban xanım Əliyevanın rəhbərliyi ilə ardıcıl tədbirlər həyata keçirilir. Heydər Əliyev Fondunun vitse-prezidenti Leyla Əliyevanın təşəbbüsü ilə keçirilən “Xocalıya ədalət!” kampaniyası çərçivəsində Xocalı soyqırımının dünyada tanıdılması istiqamətində məqsədyönlü işlər aparılır.
Tədbirdə qeyd olunub ki, 2020-ci il Vətən müharibəsində Azərbaycan Ordusu 30 il işğal altında qalan torpaqlarımızı azad edib. Qırx dörd günlük müharibədə misilsiz igidlik nümunələri göstərən qəhrəman oğullarımız Xocalı faciəsi qurbanlarının da qisasını alıb, şəhidlərimizin qanı yerdə qalmayıb.
Tədbirin sonunda Xocalı soyqırımı dəhşətlərindən bəhs edən sənədli film nümayiş olunub.