Xocavəndlilər doğma torpaqlarına qayıdacaqlarına əmindirlər
Beyləqan, 5 fevral (AZƏRTAC). Xocavənd rayonunda 2011-ci ilin yekunları və qarşıda duran vəzifələrə həsr olunmuş hesabat yığıncağı keçirilmişdir.
AZƏRTAC xəbər verir ki, tədbir iştirakçıları əvvəlcə ümummilli lider Heydər Əliyevin Xocavənd Rayon İcra Hakimiyyətinin inzibati binasının qarşısındakı büstü önünə gül dəstələri düzmüş, xatirəsini ehtiramla yad etmişlər.
Xocavənd qəsəbəsindəki mədəniyyət evində davam edən yığıncaqda çıxış edən Rayon İcra Hakimiyyətinin başçısı Eyvaz Hüseynov respublikada qazanılmış uğurlar barədə məlumat vermişdir.
Natiq bildirmişdir ki, Yeni Tuğ qəsəbəsində çiy kərpicdən tikilmiş evlərdə yaşayan 120 məcburi köçkün ailəsi və digər 200 ailə üçün həmin ərazidə yeni qəsəbənin salınması üçün 385 hektar torpaq sahəsi ayrılmış, layihə smeta sənədləri hazırlanıb Məcburi Köçkünlərin Sosial İnkişaf Fonduna göndərilmişdir. Respublikanın ayrı-ayrı rayonlarında çadır şəhərciklərində məskunlaşmış 10, fin tipli qəsəbələrdən 14, məktəb binalarından 14, kərpic evlərdə məskunlaşmış 462 ailə yeni salınmış qəsəbələrə köçürülmüş, ümumilikdə 506 ailənin mənzil problemi həll edilmiş, 172 ailənin yaşayış şəraiti qismən yaxşılaşdırılmışdır.
Sahibkarlığa Kömək Milli Fondu tərəfindən Xocavənd rayonunda sahibkarlıq fəaliyyəti ilə məşğul olan məcburi köçkünlərə, fermerlərə 317,2 min manat güzəştli kredit verilmişdir.
Xocavənd qəsəbəsində rayon icra hakimiyyəti üçün inzibati binanın tikintisi başa çatdırılmışdır. Qəsəbənin telefonlaşdırılmasına başlanılmış, 72 evə telefon xətti çəkilmişdir. Bu istiqamətdə işlər davam etdirilir. “Ekologiya ili”nin davamı olaraq ötən il 3760 müxtəlif ağac və gül kolları əkilmişdir. Rayon icra hakimiyyətinin rəsmi internet saytı (www.xocavend-ih.gov.az)fəaliyyətə başlamışdır.
Əhalinin normal eklektik enerjisi ilə təmin olunması üçün Yeni Tuğ, Yeni Xocavənd və Yeni Qaradağlı qəsəbələrini yeni tikilmiş 35/10 kilovotluq Xocavənd yarımstansiyası vasitəsi ilə qidalanması üçün “Azərenerji” ASC tərəfindən texniki şərt verilmiş, elektrik xətlərinin çəkilişi ilə əlaqədar Məcburi Köçkünlərin Sosial İnkişaf Fonduna müraciət edilmişdir.
Yeni Xocavənd, Yeni Tuğ və Xocavənd qəsəbələrinin qazlaşdırılmasına dair layihə-smeta sənədləri hazırlanmış, yaxın vaxtlarda qaz xətlərinin çəkilişinə başlanılacaqdır.
Rayon əhalisinin məşğulluğunun təmin edilməsi məqsədi ilə ötən il 61, son səkkiz ildə isə 813 yeni iş yeri açılmışdır ki, onlardan 539-u daimidir.
Ötən il ərzində rayonun fərdi və fermer təsərrüfatlarında saxlanılan iribuynuzlu mal-qaranın sayı 1895, xırda buynuzlu davarların sayı 18 min 957 baş olmuşdur. Bu dövr ərzində ət istehsalı 1460 sentner, süd istehsalı 2870 sentner, yumurta istehsalı 430 min ədəd, yun istehsalı 475 sentner olmuşdur. 2011-ci ilin məhsulu üçün rayonda 189 min 860 sentner buğda, 2430 sentner arpa istehsal edilmişdir. 2011-ci ilin payızında 2012-ci ilin məhsulu üçün 9870,3 hektar sahədə buğda, 150 hektar sahədə arpa əkilmişdir. Hesabat dövründə rayonun ümumi daxili məhsul istehsalının həcmi 7581.6 min manat olmuşdur.
Xocavənd rayon şəhidlərinin xatirəsini əbədiləşdirmək məqsədilə ermənilərin Qaradağlı kəndində törətdikləri terror və soyqırımdan bəhs edən “Qaradağlı soyqırımı” filmi çəkilmişdir. Azərbaycan, ingilis və rus dillərində olan filmin 2011-ci il fevralın 17-də təqdimat mərasimi keçirilmişdir. Vətənimizin ərazi bütövlüyü uğrunda canlarından keçmiş şəhidlərin əziz xatirəsini əbədiləşdirmək məqsədi ilə Xocavənd rayonunun Nərgiztəpə adlanan ərazisində memorial abidə xatirə kompleksi yaradılmışdır.
Hesabat dövründə məcburi köçkünlərin məskunlaşdığı 14 rayonda 45 səyyar qəbul keçirilmişdir.
Məruzə ətrafında çıxış edən idarə və müəssisə rəhbərləri görülən işlərdən, qarşıda duran vəzifələrdən danışmışlar.
Rayon ictimaiyyətinin nümayəndələri Prezident İlham Əliyevin ölkəmizin sosial-iqtisadi inkişafının sürətləndirilməsi, işğal edilmiş ərazilərimizin azad edilməsi istiqamətində fəaliyyətini dəstəklədiklərini və doğma torpaqlarına qayıdacaqlarına əminliklərini bildirmişlər.
Prezident Administrasiyasının məsul işçisi Rövşən Ağayev və Milli Məclisin deputatı Elman Məmmədov yığıncaqda çıxış etmişlər.
Sonda toplantı iştirakçıları adından Prezident İlham Əliyevə müraciəti qəbul olunmuşdur.
Bölmənin digər xəbərləri
