Xorvatiyada Azərbaycanda aparılan bərpa-quruculuq işlərindən bəhs edilib
Bakı, 30 sentyabr, AZƏRTAC
Azərbaycan-Xorvatiya parlamentlərarası əlaqələr üzrə işçi qrupunun nümayəndə heyətinin Xorvatiyaya səfəri başa çatıb.
AZƏRTAC xəbər verir ki, Xorvatiya-Azərbaycan parlamentlərarası dostluq qrupu rəhbərinin dəvəti ilə bu ölkədə səfərdə olan nümayəndə heyətinin tərkibində Azərbaycan-Xorvatiya parlamentlərarası əlaqələr üzrə işçi qrupunun rəhbəri Könül Nurullayeva, qrupun üzvləri Eldar Quliyev və Kamran Bayramov yer alıb.
Azərbaycan nümayəndə heyətinin üzvləri səfərin ilk günündə Xorvatiyanın Xarici və Avropa işləri Nazirliyinin dövlət katibi Frano Matusiçlə görüşüblər. Nümayəndə heyətinin sədri K.Nurullayeva vurğulayıb ki, Azərbaycan və Xorvatiya bir çox beynəlxalq təşkilatlar çərçivəsində səmərəli əməkdaşlıq edir və bu əməkdaşlığın qarşılıqlı şəkildə genişləndirilməsi prioritetlərdən biridir. Qarşı tərəf həmçinin iki ölkə arasında indiyədək imzalanmış sazişlər, parlamentlərarası əlaqələrin inkişafı məqsədilə görülmüş işlər, habelə beynəlxalq təşkilatlar çərçivəsində davam edən əməkdaşlıq barədə məlumatlandırılıb.
İkitərəfli münasibətlərin inkişafına toxunan Milli Məclisin Hesablayıcı Komissiyasının sədri Eldar Quliyev iki il əvvəl, sentyabrın 27-də başlanan və Azərbaycanın Zəfəri ilə başa çatan İkinci Qarabağ müharibəsindən danışıb. Bildirilib ki, Azərbaycan BMT Təhlükəsizlik Şurasının 4 qətnaməsini özü icra edərək, ərazi bütövlüyünü bərpa etdi və işğala son qoydu. Bu gün Qarabağda və Şərqi Zəngəzurda yüksək standartlara uyğun bərpa-quruculuq işləri aparıldığını bildirən E.Quliyev mina probleminin bölgənin sürətli inkişafına mane olan əsas faktorlardan biri olduğunu vurğulayıb. Mina probleminin mülki insanların həyatını itirməsinə səbəb olduğunu diqqətə çatdıran Milli Məclisin deputatı Azərbaycanın bölgədə dayanıqlı sülh və təhlükəsizliyin yaranmasında maraqlı olduğunu vurğulayıb.
Beynəlxalq münasibətlər və parlamentlərarası əlaqələr, Milli Məclisin Regional komitəsinin üzvü Kamran Bayramov isə iki ölkə arasında əlaqələrin yüksək templə inkişaf etdiyini bildirib. Azərbaycanın Şəki və Xorvatiyanın Varajdin şəhərlərinin qardaşlaşmış şəhərlər olduğunu xatırladıb. Bildirib ki, regional inkişaf ikitərəfli münasibətlərdə əsas istiqamətlərdən biridir. Bu cür regionlararası əməkdaşlıq, Azərbaycan ilə Xorvatiya arasında mövcud ikitərəfli əlaqələrin daha da genişlənməsinə öz töhfəsini verəcək.
Xorvatiyanın İqtisadiyyat və Davamlı İnkişaf Nazirliyinin dövlət katibi İvo Milatiçlə də görüşdə ölkələrimiz arasında ikitərəfli əməkdaşlıqda iqtisadi əlaqələrin mühüm yer tutduğu qeyd olunub. Bildirilib ki, Xorvatiya Azərbaycanla ticarət baxımından ən geniş əməkdaşlıq edən 10 ölkə sırasında yer alır. K.Nurullayeva Azərbaycan və Xorvatiya Hökumətləri arasında İqtisadi Əməkdaşlığın Təşviqi üzrə Birgə Komissiyanın və ölkəmizdəki Xorvatiya şirkətlərinin fəaliyyəti barədə məlumat verərək, enerji sahəsində əməkdaşlığın da perspektiv vəd etdiyini qeyd edib. Azərbaycan-Xorvatiya parlamentlərarası əlaqələr üzrə işçi qrupunun rəhbəri K.Nurullayeva Azərbaycanın işğaldan azad edilmiş ərazilərində aparılan yenidənqurma işlərində Xorvatiya şirkətlərinin də yer almasından məmnunluğunu ifadə edib və bu istiqamətdə işlərin daha da irəliləyəcəyinə əminliyini ifadə edib.
Dörd gün davam edən səfər çərçivəsində nümayəndə heyəti Karlovaçın vilayət rəhbəri Martina Furdek Haydin, şəhərin icra başçısının müavini İvano Foçiç, Xorvatiya-Azərbaycan parlamentlərarası dostluq qrupunun rəhbəri Maya Qrba Buyeviç, Karlovaç İqtisadiyyatının Xorvatiya Palatasının prezidenti Zlatko Kuzman, Karlovaç vilayətinin Xorvatiya Turizm Şurasının prezidenti Zelko Fanyak, Xorvatiya Parlamentinin Qanunvericilik Komitəsinin sədri Mariya Yelkovaç və Xorvatiya Parlamentinin Seçkilər, təyinatlar və idarəetmə Komitəsinin sədri Nada Murganiç ilə görüşüblər.
Sentyabrın 27-də Karlovaç vilayət rəhbərliyinin ofisində keçirilən görüşdə K.Nurullayeva görüşün bu gün Azərbaycanda şəhidlərin xatirəsinə ehtiram əlaməti olaraq Anım Günü kimi qeyd olunduğunu diqqətə çatdırıb. Bildirilib ki, ölkəmiz 44 gündə 30 illik işğala son qoyub və böyük Qələbə əldə edib. Xorvatiya ilə ikitərəfli münasibətlərə də toxunan Azərbaycan nümayəndə heyətinin rəhbəri Azərbaycanın Şəki şəhəri ilə Xorvatiyanın Varajdin şəhəri arasında imzalanmış əməkdaşlıq sənədləri barədə məlumat verərək Karlovaç şəhəri ilə də bu cür əməkdaşlıq imkanlarının müzakirə edilməsini təklif edib. İkitərəfli əlaqələrin perspektivlərinə toxunan E.Quliyev və K.Bayramov isə İkinci Qarabağ müharibəsində Azərbaycanın qazandığı Zəfərin regionda yaratdığı imkanlardan danışaraq, diqqəti bölgənin rifahına xidmət edən Zəngəzur dəhlizinin əhəmiyyətinə yönəldiblər.
Nümayəndə heyəti, həmçinin Xorvatiya Parlamentində Nazirlər Kabinetinin iştirakı ilə keçirilən "Açıq sual" iclasını qonaq qismində izləyiblər. Xorvatiyanın Baş naziri Andrey Plenkoviç, Nazirlər Kabinetinin üzvləri, eləcə də Xorvatiya Parlamentinin deputatları Azərbaycan nümayəndə heyətini salamlayıblar.
Azərbaycan nümayəndə heyəti Xorvatiyanın bir sıra rəsmiləri ilə görüş keçiriblər. Xorvatiya Parlamenti sədrinin müavini Davorko Vidoviç, Xorvatiya-Azərbaycan parlamentlərarası dostluq qrupunun rəhbəri Maya Qrba-Buyeviç, Xorvatiya Parlamentinin Avropa işləri Komitəsinin sədri Domaqoy Haydukoviç və Xarici siyasət Komitəsi sədrinin müavini Davor Ivo Stir, həmçinin parlamentin İqtisadiyyat komitəsinin sədri Zarko Tuşek ilə görüşdə iki ölkə arasındakı inkişaf etməkdə olan əlaqələr, parlamentlərarası münasibətlərdən bəhs edilib. Milli Məclisin deputatları həmkarlarına Azərbaycanda aparılan bərpa-quruculuq işləri barədə məlumat veriblər. Eyni zamanda mina probleminə toxunulub və Ermənistanın postmünaqişə dövründə də destruktiv siyasət yürütdüyü bildirilib. Ermənistanın bu mövqeyinin bölgədə davamlı sülh və təhlükəsizliyə mane olduğu diqqətə çatdırılıb. Görüşdə həmçinin ölkələrimiz arasında iqtisadi, mədəniyyət, elm, idman sahələri ilə bağlı müzakirələr aparılıb və bu istiqamətdə əlaqələrin daha da inkişaf etdirilməsinin vacibliyi vurğulanıb.
Azərbaycan nümayəndə heyətinin üzvləri Xorvatiyanın Turizm və idman naziri Nikolina Brnyak ilə də görüşüblər, iki ölkə arasındakı mövcud əməkdaşlıq əlaqələrinin daha da genişləndirilməsi istiqamətində müzakirələr aparıblar.
Bölmənin digər xəbərləri
