Bakı, 19 aprel, AZƏRTAC

Azərbaycan Respublikası Xüsusi Olimpiya Komitəsi Şağan Olimpiya İdman Kompleksində oğlanlar arasında cüdo üzrə seçmə yarışları keçirib.

AZƏRTAC xəbər verir ki, seçmə yarışlar xüsusi Olimpiya proqramına uyğun olaraq müxtəlif çəkilər üzrə təşkil edilib. Turnirin yekun nəticəsinə görə, komanda hesabında birinci yeri 2 qızıl, 1 gümüş medalla Sabunçu rayonu 11 nömrəli inteqrasiya təlimli internat tipli məktəbin idmançıları tutublar. İkinci yerdə Sumqayıt şəhər inteqrasiya təlimli internat tipli gimnaziyanın (2 qızıl, 1 gümüş), üçüncü pillədə isə Sabunçu rayonu 170 nömrəli inklüziv sinifli tam orta məktəbin (1 qızıl, 1 bürünc medal) cüdoçuları qərarlaşıblar.

Qeyd edək ki, yarışlarda hər bir komandanın tərkibində 3 oğlan olmaqla, ümumilikdə 30-dan çox atlet iştirak edib.

Xüsusi Olimpiya Komitəsinin yığma komandası çəkilər üzrə ən çox medal qazanmış komandanın bazasında komplektləşdiriləcək və 2023-cü ilin iyun ayında Almaniyanın paytaxtı Berlin şəhərində baş tutacaq Ümumdünya Xüsusi Yay Olimpiya Oyunlarında iştirak edəcək.