“Yer və Ay” animasiya filmi Özbəkistanla Azərbaycan arasında ilk beynəlxalq birgə animasiya istehsalıdır
Bakı, 15 dekabr, Anara Axundova, AZƏRTAC
“Baku Cinema Breeze” və “ATA Festival” çərçivəsində “Nizami” Kino Mərkəzində “Yer və Ay” qısametrajlı animasiya filminin premyerası keçirilib.
Film Özbəkistanın “DIP Animation” studiyası ilə Azərbaycanın “PERI FILM” studiyası arasında əməkdaşlıq çərçivəsində, Azərbaycan Respublikası Kino Agentliyinin (ARKA) və “ANIMAFILM Studio”nun maliyyə dəstəyi ilə ərsəyə gəlib.
Hekayənin mərkəzində bəşəriyyətin gəlişi ilə dəyişən Yer və Ayın dostluğu dayanır. Bu, təbiətə münasibət, məsuliyyət və harmoniya haqqında sadə, eyni zamanda, çoxqatlı və ibrətamiz bir hekayədir.
Filmin rejissoru, Özbəkistandan olan Pavel Kim layihə üzərində aparılan işlər barədə danışıb: “Bu filmi çəkmək ideyası 10 il əvvəl yaranmışdı, lakin onu yalnız iki il əvvəl reallaşdırmağa başladıq. Texnikanın kombinasiya olunmuş şəkildə istifadəsinə qərar verdik: filmin bir hissəsi 3D, bir hissəsi 2D, bir hissəsi isə canlı çəkilişdir. Əvvəlcə filmi kosmosda qurulmuş bir tamaşa kimi təsəvvür edirdik. Ssenari üzərində işləməyə və ideyanı formalaşdırmağa başladıq.
Həmin dövrdə “ANIMAFILM” festivalında Azərbaycandan olan 2D animatorlarla tanış olduq və filmin 2D hissəsini Azərbaycanda çəkmək qərarına gəldik. Layihə postprodakşn mərhələsinə çatanda Azərbaycan komandası bu prosesi birgə həyata keçirməyi təklif etdi. Biz ideyanı müsabiqəyə təqdim etdik və qalib olduq. Beləliklə, film birgə istehsal formatında ərsəyə gəldi. Bu, layihəni xeyli zənginləşdirdi və daha maraqlı etdi. Əməkdaşlıq çox uğurlu alındı. Birgə istehsalın üstünlüyü ondadır ki, burada artıq bir deyil, iki yaradıcı baxış var və nəticədə film daha yaxşı alınır”, - deyə rejissor vurğulayıb.
Pavel Kimin sözlərinə görə, hazırda türk ölkələrində animasiya sənayesi inkişafın ilkin mərhələsindədir. “Yer və Ay” layihəsi üzərində işləyərkən komanda əvvəlcədən beynəlxalq bazarı hədəfləyib. Rejissorun fikrincə, türk animasiyası əsasən ailə dəyərləri, adət-ənənələr, tarix və mədəni kodlarla seçilir: “Animasiya yaradarkən biz qaçılmaz olaraq milli ornamentlərə, ənənəvi geyimlərə, mədəniyyətə və dilə söykənirik. Animasiyamızı həqiqətən unikal edən də məhz budur. Eyni zamanda, onu qlobal auditoriya üçün anlaşılan və cəlbedici etməyə çalışırıq”.
Onun fikrincə, türk mədəniyyətinin beynəlxalq səhnədə səmərəli şəkildə tanıdılması yalnız orijinal ideyalara və yüksək peşəkarlıq səviyyəsinə malik layihələr vasitəsilə mümkündür. Burada keyfiyyət həlledici rol oynayır.
“Layihə üzərində işləməyə başlayanda tez-tez “Özbəkistanda animasiyanın mövcud olduğunu bilmirdik” və ya “Bu səviyyədə animasiyanın yaradılacağını gözləmirdik” kimi rəylər eşidirdik. Filmin Özbəkistanda hazırlandığını dərk etmək insanların ölkəmizə münasibətini dəyişir”, - deyə Pavel Kim bildirib.
O, həmçinin qeyd edib ki, Özbəkistanda, Azərbaycanda və digər türk ölkələrində kinonun universal dili ilə yaradılan peşəkar layihələr dünya miqyasında geniş rezonans doğura bilər. Bu yolla animasiya və kino vasitəsilə türk mədəniyyəti təbii şəkildə region hüdudlarından kənara yayılır.
“PERI FILM” və “ANIMAFILM Studio”nun təsisçisi, filmin prodüseri Rəşid Ağamalıyev premyeranın gedişi, eləcə də layihə ilə bağlı plan və gözləntilərdən danışıb: “Nizami” Kino Mərkəzində keçirilən yerli premyera olduqca səmimi atmosferdə baş tutdu. Rejissor Pavel Kimlə birlikdə tamaşaçıların böyük marağını və xüsusilə uşaqların sevincini hiss etdik. Tamaşaçıların filmin süjetinə və vizual dilinə verdiyi reaksiyanı görmək bizim üçün çox vacib idi. Növbəti mərhələdə beynəlxalq festivallara hazırlaşırıq. Ümid edirik ki, “Yer və Ay” həm sənət əsəri kimi, həm də təbiətə qayğıya çağıran bir mesaj olaraq müxtəlif ölkələrdə tamaşaçılar tərəfindən müsbət qarşılanacaq”.
Rəşid Ağamalıyev vurğulayıb ki, “Yer və Ay” Özbəkistanla Azərbaycan arasında ilk beynəlxalq birgə animasiya istehsalıdır və bu faktın özü mühüm əhəmiyyət daşıyır: “Bu cür əməkdaşlıqlar geniş imkanlar açır - təcrübə mübadiləsi, texnologiyaların inkişafı və daha iddialı layihələrin yaradılması baxımından. Ən əsası isə mədəni əlaqələrin möhkəmlənməsi və birgə yaradıcılıq üçün yeni platformaların formalaşmasıdır. Əminik ki, bu layihə ölkələrimiz arasında gələcək böyük təşəbbüslər üçün güclü təməl olacaq”.
Bölmənin digər xəbərləri
