YES-İN BAKI SAMMİTİNDƏ İŞTİRAK EDƏN NAZİRLƏRİN GÖRÜŞÜ OLMUŞDUR
AZƏRTAC xəbər verir ki, Heydər Əliyev Fondunun, Gənclər və İdman Nazirliyinin təşkilatçılığı ilə Bakıda keçirilən Dünya gənclərinin IV məşğulluq sammitinin (YES) iştirakçıları olan nazirlər sentyabrın 26-da “Ambassador” mehmanxanasında görüşmüşlər.
Azərbaycanın gənclər və idman naziri Azad Rəhimov xarici həmkarlarını salamlamış və demişdir ki, bir neçə gündür davam edən sammitin işi çox məhsuldardır. Artıq müəyyən nəticələrə gəlmək olar və bu nəticələr gələcək fəaliyyət proqramımızın müəyyənləşdirilməsində mühüm rol oynayacaqdır. Nazir sammitin bütün dünyanın diqqətini gənclərin problemlərinə yönəltmək, gələcək üçün bir daha nikbinlik oyatmaq baxımından əhəmiyyətini qeyd etmişdir. O, Azərbaycanın və Misirin birinci xanımları Mehriban Əliyevanın və Syuzan Mübarəkin forumun keçirilməsinə dəstəyini, onun rəsmi hissəsində iştirakını xüsusi vurğulamış, çıxışlarında irəli sürdükləri ideyaları yüksək qiymətləndirmişdir. Məlumat vermişdir ki, nazirlərin bu forumunda sammitin yekununa dair Bakı bəyannaməsinin mətni də hazırlanacaqdır.
“YES İnc”in prezidenti xanım Punam Ahluvalia, Beynəlxalq Əmək Təşkilatının MDB və Şərqi Avropa üzrə direktoru xanım Elen Fultz, Beynəlxalq Əmək Təşkilatının kiçik sahibkarlığın inkişafı üzrə proqram əlaqələndiricisi Martin Kleminson, Talber Fondunun (İsveç) təmsilçisi Karl Mosfeldt, YUNESKO-nun proqram meneceri xanım Nainq Yee Mar, İsgəndəriyyə kitabxanasının direktoru İsmayıl Səragəldin çıxış etmişlər. Onlar sammitin əhəmiyyətini, onun yüksək səviyyədə təşkilini vurğulamışlar. Natiqlər gənclərin məşğulluğu ilə bağlı mülahizələrini söyləmiş, bu sahədə Azərbaycanın təcrübəsini təqdir etmişlər.
Karl Mosfeld məlumat vermişdir ki, 2010-cu ildə YES-in V sammitinə İsveç ev sahibliyi edəcəkdir.
Sonra Bakı bəyannaməsinin mətni müzakirə edilib razılaşdırılmışdır. Sənədin sentyabrın 27-də qəbul ediləcəyi nəzərdə tutulmuşdur.
######
Bölmənin digər xəbərləri
