YOL POLİSİ MƏNZİL-TİKİNTİ MÜƏSSİSƏLƏRİNİN RƏHBƏRLƏRİNƏ SONUNCU DƏFƏ XƏBƏRDARLIQ EDİR
Sərəncamda qeyd olunur ki, avtomobil nəqliyyatı ilə yük və sərnişin daşımalarını tənzimləyən normativ hüquqi bazanın təkmilləşdirilməsinə dair normativ hüquqi aktların layihələri hazırlansın, yol hərəkəti qaydaları tələblərinin pozulmasına görə inzibati cəza tədbirləri gücləndirilsin. Bakı şəhərinin küçə və prospektlərində çatışmayan yol nişanlarının, o cümlədən dayanma və durmanı qadağan edən yol nişanları qoyulsun, avtomobillərin qadağan olunan sahələrdə dayanmalarının qarşısı alınsın. Şəhərin mərkəzi hissəsinə xüsusi təyinatlı, qəza-xilasetmə xidmətlərə aid yük avtomobilləri istisna olmaqla, yükgötürmə qabiliyyəti 5 tondan artıq olan yük avtomobillərinin hərəkətinə saat 08:00-dan 21:00-dək məhdudiyyət qoyulsun.
Həmçinin, Sərəncamla yol hərəkəti haqqında qanuna uyğun olaraq, Azərbaycan Respublikası Nazirlər Kabinetinin Yol Hərəkətinin Təhlükəsizliyi Komissiyası ilə razılaşdırılmadan inşaat işlərinin aparılması ilə əlaqədar küçələrin bağlanılması, daraldılması və səkilərin tutulması qadağan edilmişdir.
Bakı Şəhər Dövlət Yol Polisi İdarəsindən AZƏRTAC-a verilən məlumatda bildirilir ki, Azərbaycan Prezidentinin 2006-cı il 1 fevral tarixli Sərəncamının tələblərini yerinə yetirməyən mənzil-tikinti müəssisələrinin rəhbərlərinə idarə tərəfindən sonuncu dəfə xəbərdarlıq edilmişdir.
Buna baxmayaraq, yenə də paytaxtın Murtuza Muxtarov və B.Bağırov küçələrinin kəsişməsi Əli Məmməd oğlu Muradova məxsus “Mütəfəkkir” şirkəti tərəfindən qismən, İsmayıl bəy Qutqaşınlı küçəsi Cəfər Əsgərova məxsus “Best Komers” MTK şirkəti tərəfindən qismən, Süleyman Tağızadə və H.Hacıyev küçələrinin kəsişməsi təsisçisi Fərrux Yıldız olan “Azər Gur” MMC şirkəti tərəfindən tam bağlanmışdır.
Bundan əlavə, Bəşir Səfəroğlu küçəsi prezidenti Sərdar Tağıyev olan “ATS” şirkəti tərəfindən qismən, Nəsib bəy Yusifbəyli küçəsi Azadlıq prospekti 108 İlqar Əli oğlu Həsənova məxsus “Nur” MMC şirkəti tərəfindən qismən, Vidadi küçəsi 145 təsisçisi Yavər Əbdüləzim oğlu Qurbanov olan “Eyfel” MTK şirkəti tərəfindən tam bağlanmışdır.
Həmçinin, Dilarə Əliyeva küçəsi, 670-ci məhəllə prezidenti Sahib Həsənov olan “Kaspi Servis” şirkəti tərəfindən tam, Topçubaşov küçəsi 351-ci məhəllə, Tolstoy küçəsinin kəsişməsindən təsisçisi Fəxri Fərhad oğlu İbrahimov olan “Konsul” MKT şirkəti tərəfindən tam, Salatın Əsgərova və R.Behbudov küçələrinin kəsişməsi direktoru Rasim Süleyman oğlu Mahmudov olan “Qlobal” MMC şirkəti tərəfindən qismən, Xan Şuşinski və Möhsün Sənani küçələrinin kəsişməsi isə baş direktoru İsgəndər Musa oğlu Nəsibov olan “Real MTK” şirkəti tərəfindən tam bağlanmışdır.
