Yüksəkkeyfiyyətli qida məhsullarının idxalı üçün sahibkarlara hər cür kömək göstəriləcək VİDEO
Bakı, 31 oktyabr, AZƏRTAC
Oktyabrın 31-də Qida Təhlükəsizliyi Agentliyinin sədri Qoşqar Təhməzli qida məhsullarının idxalı ilə məşğul olan sahibkarlarla görüşüb.
AZƏRTAC xəbər verir ki, görüşdə sədr əhalinin sağlam və təhlükəsiz qida məhsulları ilə təmin edilməsinin agentlik qarşısında duran əsas vəzifə olduğunu bildirib. O, ölkəyə təhlükəsiz, eləcə də beynəlxalq standartlara uyğun qida məhsullarının idxalının qida təhlükəsizliyinin təmin edilməsi baxımından böyük əhəmiyyət daşıdığını qeyd edib.
Onun verdiyi məlumata görə, son dörd ayda ölkəmizə qida məhsulları idxal edən şirkətlər üzərində dövlət nəzarəti zamanı 56 şirkətin idxal etdiyi məhsulların təhlükəsiz olduğu müəyyən edilib. Onların ölkəyə idxal etdiyi qida məhsullarının laborator ekspertizasının nəticələri bunu deməyə əsas verir.
Agentlik sədri əlavə edib ki, noyabrın 1-dən qida məhsulları idxal edən bir sıra şirkətlərə asanlaşdırılmış nəzarət sistemi tətbiq olunacaq: “Yəni daha aşağı riskli məhsulların laborator müayinəsi, ekspertizası və nəzarətə cəlb olunma tezlikləri daha uzun müddətli, yüksək riskli məhsulların araşdırılması isə daha sıx tezliklə həyata keçiriləcək. Bu, sahibkarlara daha asanlıqla müxtəlif ölkələrdən qida məhsulları idxal etməyə imkan verəcək”.
Sahibkarlarla görüşdə qeyd olunub ki, son illər milli iqtisadiyyat perspektivi üzrə Strateji Yol Xəritəsi çərçivəsində həyata keçirilən islahatlar, kənd təsərrüfatı və qida sənayesi sektorunda müasir standartların tətbiq olunması yerli istehlakçıların hüquqlarının müdafiə olunmasına və idxal zamanı qida məhsullarının təhlükəsizliyinin təmin edilməsinə nəzarət imkanlarını genişləndirir. Agentliyin sədri ölkəyə təhlükəsiz və yüksəkkeyfiyyətli qida məhsullarının idxalı qida zəncirinin bütün mərhələlərində, eləcə də qida məhsullarının tədarükü, qablaşdırılması, saxlanılması, daşınması və dövriyyəsi zamanı qanunvericiliyin tələblərinə əməl olunmasının vacibliyini sahibkarların nəzərinə çatdırıb. O, bundan sonra da idxalçı sahibkarlara hər bir metodiki kömək göstəriləcəyini, qida zəncirinin bütün mərhələlərində fəaliyyət göstərən sahibkarlıq subyektlərinin maarifləndirilməsi işlərinin davam etdiriləcəyini də bildirib.
Q.Təhməzli jurnalistlərin suallarına cavab verərkən deyib: “Qida təhlükəsizliyi ilə əlaqədar sanitariya-gigiyena qaydaları ən çox ictimai iaşə müəssisələrində, şadlıq evlərində, xüsusilə də insanların kütləvi qidalanma məkanlarında pozulur. Həmin müəssisələrdə xüsusi monitorinqlər keçiriləcək. Qida təhlükəsizliyi sahəsində agentliyin aparacağı yoxlamalar zamanı, əsasən, həmin ictimai iaşə müəssisələrinə xəbərdarlıq ediləcək. Müəssisə sahiblərinə mənşəyi məlum olmayan məhsulların kütləvi istifadəsinin qadağan olduğu və yalnız qida təhlükəsizliyi sertifikatı ilə təmin olunmuş ərzaqların istifadəsinin vacibliyi xatırladılacaq. Ümumiyyətlə, bütün iaşə müəssisələrinin istifadə etdikləri məhsullar müvafiq ekspertizalara cəlb olunmalı, əməkdaşları isə dövri tibbi müayinələrdən keçməlidir. Qida hazırlanan yerlər sanitar-texniki və sanitar-gigiyenik göstəricilərə uyğun olmalıdır. Əks təqdirdə həmin müəssisələr üzərində lazımi dövlət nəzarəti həyata keçirilərkən inzibati tədbirlər görüləcək”.
Görüşdən sonra agentliyin sədri jurnalistləri maraqlandıran bir sıra suallara cavab verib.
Bölmənin digər xəbərləri
