“Yüksəliş”in qalibi Azad Qəribov: Bu müsabiqə bir məktəbdir
Bakı, 20 fevral, Xatirə Cəfərova, AZƏRTAC
“Yüksəliş” müsabiqəsini təkcə bilik və bacarıqların qiymətləndirilməsi deyil, həm də böyük bir məktəb hesab edirəm.
Bu fikri AZƏRTAC-a müsahibəsində üçüncü “Yüksəliş” müsabiqəsinin qalibi Azad Qəribov söyləyib.
Lerikdə anadan olub, Bakıda bakalavriat, Qlazqoda magistratura, Vyanada doktorantura təhsili alıb
A.Qəribov 1987-ci ildə Lerik rayonunda anadan olub. 2005-ci ildə orta məktəbi əla qiymətlərlə bitirərək Bakı Dövlət Universitetinə qəbul olaraq beynəlxalq münasibətlər ixtisası üzrə təhsil alıb. Qəbul imtahanında ən yüksək nəticə göstərdiyi üçün Prezident təqaüdünə layiq görülüb. 2009-cu ildə universiteti fərqlənmə diplomu ilə bitirib. “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində Böyük Britaniyanın Qlazqo Universitetində təhsil alıb, 2010-cu ildə siyasi elmlər üzrə magistr dərəcəsi alıb. 2011-2017-ci illərdə Azərbaycan Respublikası Prezidenti yanında Strateji Araşdırmalar Mərkəzində (SAM) elmi işçi və aparıcı elmi işçi vəzifəsində çalışıb, müxtəlif dövlət qurumları üçün analitik arayış və hesabatlara müəlliflik edib, bir sıra tədqiqat layihələrinin rəhbəri olub, beynəlxalq tədbirlərin ölkəmizdə təşkil olunmasını koordinasiya edib. SAM-ın ATƏT-in Beyin Mərkəzləri Şəbəkəsinə üzv qəbul edilməsi prosesinə rəhbərlik edib, 2014-2016-cı illərdə bu təşkilatın təmsilçisi olub və ATƏT-in 21-ci Nazirlər Şurası üçün hazırlanmış hesabata həmmüəlliflik edib. Həmçinin 2015-2017-ci illərdə SAM tərəfindən İstanbulda dərc edilən “Caucasus International” jurnalının baş redaktoru olub, 2016-2017-ci illərdə Bakı Dövlət Universitetinin “SABAH” qruplarında beynəlxalq münasibətlər üzrə dərs deyib. 2017-2023-cü illərdə Avstriyanın Vyana şəhərində yerləşən Mərkəzi Avropa Universitetində doktorantura təhsili alıb, təhsilini fərqlənmə diplomu (Summa Cum Laude) ilə bitirərək siyasi elmlər üzrə fəlsəfə doktoru elmi dərəcəsinə layiq görülüb. Doktorantura təhsili müddətində Avstriyada siyasi elmin tədqiqat və təhlil metodları və müqayisəli siyasət fənlərindən dərs deyib.
Təhsil illərində beyin mərkəzlərində konsultant-analitik kimi çalışıb
Təhsil illərində həmçinin Bakıda yerləşən Beynəlxalq Münasibətlərin Təhlili Mərkəzi və Vaşinqtonda yerləşən Ceymstaun Fondu kimi beyin mərkəzlərində konsultant-analitik kimi çalışıb. 2014-cü ildə İtaliyada nəşr edilmiş “Xəzər şahmat taxtası: geosiyasi, geostrateji və geoiqtisadi təhlil” kitabının redaktoru və həmmüəllifidir. ABŞ, Böyük Britaniya, Almaniya, Fransa, İtaliya və Rumıniyada dərc edilmiş elmi məqalə, kitab fəsilləri və təhlillərə müəlliflik edib, ölkə xaricində çoxsaylı konfranslarda çıxış edib.
Hazırda Ümumdünya Səhiyyə Təşkilatında kommunikasiya meneceri, ADA Universitetində “Qlobal siyasət”, "Dövlət və siyasət" fənlərini tədris edir.
“Yüksəliş” müsabiqəsində iştirak etmək qərarına gəldi
“Azərbaycana qayıtdıqdan sonra ölkə xaricindəki təhsilimdən və iş həyatımdan əldə etdiyim bilik və bacarıqlarımın hazırda ölkənin professional mühitində nə qədər rəqabətqabiliyyətli olduğu məni düşündürürdü. “Yüksəliş” müsabiqəsi əslində belə bir imkan təqdim edirdi. Bilirdim ki, ölkənin ən bacarıqlı, perspektivli gəncləri bu yarışmaya toplanacaqlar. Qərara gəldim ki, öz bilik və bacarıqlarımı onların bilik və bacarıqları, təcrübələri ilə müqayisə edim. Həmçinin düşünürdüm ki, mentorlardan, idarəedici rəhbərlərdən öyrənəcək çox şey var. Onlarla ünsiyyətdə olmaq, birlikdə çalışmaq bizə öz perspektivlərimizi genişləndirməyə, onların uzun illərdən bəri toplanmış təcrübə, bilik və bacarıqlarımızdan yararlanmağa kömək edəcək. Bütün bu məsələlər “Yüksəliş” müsabiqəsində iştirakıma qərar verməyimdə əsas rol oynadı.
“Yüksəliş” kifayət qədər enerji və diqqət tələb edən, bir neçə mərhələdən ibarət olan müsabiqədir. Özümü sınadım və qalib gəldim. Burada yalnız bilik yox, həm də səriştələr ölçülür. Yəni yumşaq bacarıqlar, komanda işi, kommunikasiya, nəticə yönümlülük, sosial məsuliyyətlilik... Bütün bunlar xüsusi olaraq bilik tələb etmir. Bu, həyat təcrübəmiz və professional karyeramız müddətində formalaşdırdığımız bacarıqlardır. İş həyatında da bunlar çox önəmlidir. Texniki biliklərə malik bir şəxs yaxşı işçi ola bilər. Amma yaxşı rəhbər olmaq üçün, həmçinin onu tamamlayan səriştələr – yumşaq bacarıqlar lazımdır”, - deyə Azad Qəribov qeyd edib.
Yaxşı rəhbər
Müsahibimiz deyir ki, iş yeri seçərkən, iki meyarı əsas götürüb: “Birincisi insanlara faydalı ola biləcəyim, onların həyatını yaxşılığa doğru dəyişə biləcəyim, ikincisi isə özümü inkişaf etdirə biləcəyim yerlərdə çalışmaq istəmişəm. Mənə görə yaxşı rəhbər komandanın potensialını maksium üzə çıxarıb ondan istifadə edə, onu inkişaf etdirə bilən şəxsdir. Hər bir əməkdaşı yaxşı tanımaq, ona işçidən əlavə insan kimi yanaşmaq lazımdır. Onların şəxsi professional inkişafına dəstək olmaq lazımdır”.
Uğura gedən yol
“Daim inkişaf etmək lazımdır. Daim öyrənmək lazımdır. Bu, yaşa, bilik və bacarıqlarımızın səviyyəsinə baxmır. Gənclərə tövsiyəm odur ki, uğurun kəsə yolunu axtarmasınlar. Əsas odur ki, məqsədyönlü olsunlar, məqsədlərinə görə davamlı olaraq irəliləsinlər, özlərinə inansınlar və daima özlərini inkişaf etdirsinlər. Bu yol onları uğura aparacaq”, - deyə müsabiqə qalibi fikrini yekunlaşdırıb.
Xatırladaq ki, “Yüksəliş” müsabiqəsi Azərbaycan Prezidentinin 2019-cu il 26 iyul tarixli Sərəncamına əsasən təsis olunub. Müsabiqənin məqsədi 21-51 yaş aralığında intellektual səviyyəsi və ikiillik idarəçilik təcrübəsi olan perspektivli rəhbər şəxslərin müəyyənləşdirilməsini, dəstəklənməsini və ölkədə kadr ehtiyatı bankının yaradılmasını təmin etməkdir.
“Yüksəliş” müsabiqəsinin qalibini bir il ərzində idarəçi rəhbərlərdən – böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı və 20 min manat dəyərində pul mükafatı gözləyir.
Növbəti - dördüncü “Yüksəliş” müsabiqəsinin keçirilməsi ilə bağlı Azərbaycan Prezidenti tərəfindən 2023-cü il dekabrın 25-də Sərəncam imzalanıb.
Bölmənin digər xəbərləri
