Zəfər Günü Tehranda təntənəli şəkildə qeyd olunub VİDEO
Tehran, 9 noyabr, AZƏRTAC
Noyabrın 8-də Tehrandakı “Espinas” otelində Azərbaycan Respublikasının İran İslam Respublikasındakı səfirliyi tərəfindən 8 Noyabr - Zəfər Günü ilə bağlı rəsmi qəbul təşkil olunub.
Tədbirdə İran Xarici İşlər Nazirliyinin və digər dövlət qurumlarının rəsmi şəxsləri, xarici ölkələrin İrandakı səfirləri, hərbi attaşeləri və diplomatları, ziyalılar, sənət adamları, Tehranda yaşayan azərbaycanlılar, kütləvi informasiya vasitələrinin və ictimaiyyətin nümayəndələri iştirak ediblər.
AZƏRTAC xəbər verir ki, tədbirdən öncə səfirliyimizin əməkdaşlarının övladları tərəfindən çəkilən rəsmlərdən ibarət “Şanlı Qələbəmiz” mövzusunda təşkil edilmiş sərgiyə baxış keçirilib.
Vətən müharibəsi şəhidlərinin xatirəsi bir dəqiqəlik sükutla anılıb. Dövlət himnlərinin səsləndirilməsi başlanan rəsmi qəbulda Azərbaycanın şanlı qələbəsini əks etdirən videoçarx nümayiş olunub.
Tədbir iştirakçılarını salamlayan Azərbaycanın İrandakı səfiri Əli Əlizadə 44 günlük Vətən müharibəsinin hər bir gününün şanlı tarix olduğunu bildirib. Səfir 30 il ərzində Azərbaycanın bu münaqişə ilə bağlı həqiqətləri dünya ictimaiyyətinə çatdırdığını, məsələnin BMT-nin qətnamələri və beynəlxalq hüququn prinsipləri əsasında həllinə çalışdığını, lakin təcavüzkar Ermənistanın münaqişənin sülh yolu ilə həllinə heç zaman maraqlı olmadığını vurğulayıb. Beynəlxalq birliyin hər hansı bir ciddi təzyiqi, sanksiyaları ilə qarşılaşmayan təcavüzkar Ermənistanın son illər daha da azğınlaşdığını və təxribatlarını davam etdirərək sonda Azərbaycana qarşı hücuma keçdiyini bildirən səfir Əli Əlizadə, Müzəffər Ali Baş Komandan İlham Əliyevin əmri ilə rəşadətli Azərbaycan Ordusunun Ermənistanın yeni torpaqları işğal etmək niyyəti və arzularını puç etdiyini qeyd edib.
Səfir Ali Baş Komandan İlham Əliyevin qətiyyətli və müdrik rəhbərliyi, xalqımızın möhkəm iradəsi və birliyi, qəhrəman şəhidlərimizin fədakarlığı, müzəffər ordumuzun əzmi, peşəkarlığı və şücaəti hesabına təcavüzkar Ermənistanın təslim olmağa məcbur edildiyini və Azərbaycanın öz əzəli torpaqlarını işğaldan azad etdiyini diqqətə çatdırıb. Əli Əlizadə Azərbaycanın şanlı qələbəsinin ədalətin və beynəlxalq hüququn zəfəri olduğunu, 30 il sürən uzunmüddətli işğala, təcavüzə və ədalətsizliyə son qoyulduğunu, BMT qətnamələrinin Azərbaycanın qətiyyətli addımları və özünümüdafiə hüququ sayəsində icra edildiyini bildirib.
Hazırda işğaldan azad edilmiş torpaqlarda sürətli quruculuq və bərpa işlərinin aparıldığını vurğulayan səfir Əli Əlizadə Azərbaycanın beynəlxalq hüquqa, ərazi bütövlüyü və beynəlxalq sərhədlərin toxunulmazlığı prinsiplərinə ciddi riayət edilməsi əsasında Ermənistanla münasibətləri normallaşdırmağa hazır olduğunu vurğulayıb.
Zəfər Gününün Azərbaycan xalqı üçün əlamətdar və tarixi gün olduğunu bildirən Əli Əlizadə, bu günün İranda qeyd olunmasının da xüsusi əhəmiyyət kəsb etdiyini və İranın yaxın qonşu ölkə olaraq Azərbaycanın ərazi bütövlüyünü daim dəstəklədiyini qeyd edib, Zəfər Günü münasibətilə təbriklərə görə İran Xarici İşlər Nazirliyi və Hökumətinə təşəkkürlərini çatdırıb.
Rəsmi qəbulda ziyafət verilib.
Tədbir səfirliyin əməkdaşlarının övladlarının və “Aylan” rəqs qrupunun “Qarabağ”, “İgidlər” və digər Azərbaycan xalq rəqslərinin, eləcə də Azərbaycana aid müxtəlif videoçarxların nümayişi ilə davam edib.
Rabil Kətanov
AZƏRTAC-ın xüsusi müxbiri
Tehran
Bölmənin digər xəbərləri
