“Azərbaycan mətbəxi məktəbi”nin növbəti məşğələsində yapon xanımlara mətbəximizin şahı plov təqdim edilib VİDEO
Tokio, 25 aprel, AZƏRTAC
Tokioda fəaliyyət göstərən “Azərbaycan mətbəxi məktəbi”nin növbəti məşğələsində yapon xanımlara mətbəximizin şahı plovun hazırlanması qaydaları öyrədilib.
AZƏRTAC xəbər verir ki, Yaponiya paytaxtının Setaqaya rayonunda yerləşən Tsurumaki Beynəlxalq Əməkdaşlıq Mərkəzində təşkil edilən növbəti məşğələdə məktəbin təşkilatçıları, Yaponiyada yaşayan azərbaycanlı xanımlar Nərminə Aslanova və Dinarə Ələkbərova ölkəmiz, onun coğrafi mövqeyi, zəngin mədəniyyəti və mətbəxi haqqında məlumat veriblər. Bildirilib ki, bütün dünyada “Made in Azerbaijan” brendi ilə tanınan və öz keyfiyyəti ilə seçilən bir çox ərzaq məhsulları və içkilər artıq Yaponiya bazarında da özünə yer tutur.
Məşğələlər zamanı yapon xanımların iştirakı ilə Azərbaycan mətbəxinin şahı hesab olunan plov, həmçinin kükü, çoban salatı və ayran hazırlanıb. Qədim və zəngin Azərbaycan mətbəxinin bu nümunələrinin hazırlanması qaydası və lazım olan inqrediyentlər barədə yapon xanımlara ətraflı məlumat verilib. Yapon xanımların iştirakı ilə hazırlanan bu yeməklər qonaqlara təqdim edilib.
Məşğələnin iştirakçıları İkuyo İnamoto və Veronika Yastremskaya AZƏRTAC-ın Yaponiyadakı xüsusi müxbirinə bildiriblər ki, Azərbaycan mədəniyyəti, milli yeməklərin hazırlanmasında birbaşa iştirak etmək məşğələ iştirakçıları tərəfindən böyük maraqla qarşılanıb: “Bu gün biz ilk dəfə Azərbaycan yeməklərinin hazırlanmasına həsr edilən məşğələdə iştirak etdik. Çox maraqlı məşğələyə görə, təşkilatçılara xüsusi minnətdarlığımızı bildiririk. Azərbaycan milli mətbəxinin belə dadlı yeməkləri ilə tanış olmaq çox xoş oldu. Xüsusən plov çox dadlı idi. Kükü, çoban salatı və ayran da çox xoşumuza gəldi. Hamısı çox ləzzətli idi. Düşünürük ki, bu məşğələlər Azərbaycanın, zəngin mədəniyyətinizin və mətbəxinizin Yaponiyada təbliği baxımından çox əhəmiyyətli olacaq. Gələn məşğələlərdə böyük məmnuniyyətlə iştirak edəcəyik”.
Məktəbin təçkilatçılarından biri olan Dinara Ələkbərova isə bildirib ki, bu dəfəki məşğələdə diqqəti cəlb edən məqam yalnız yapon xanımların deyil, Tokioda yaşayan digər millətlərin nümayəndələrinin də Azərbaycan mətbəxinə böyük maraq göstərməsi oldu. Bu, bizi daha da həvəsləndirir və məktəbin növbəti məşğələlərində zəngin Azərbaycan mətbəxinin digər nümunələrinin hazırlanmasını davam etdirəcəyik.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
