Dövlət qulluğuna qəbul sisteminin daha da inkişaf etdirilməsində müsbət nəticələr əldə olunub YENİLƏNİB 2 VİDEO
Bakı, 25 yanvar, AZƏRTAC
Yanvarın 25-də “Azərbaycanın dövlət qulluğu sistemində islahatların davam etdirilməsinə dəstək” adlı Tvinninq layihəsinin bağlanış mərasimi keçirilib.
Avropa İttifaqı tərəfindən maliyyələşdirilən layihə artıq 2 ildən çoxdur ki, Litva Respublikasının tərəfdaşlığı ilə həyata keçirilib. Layihə çərçivəsində benefisiar qurum Azərbaycan Respublikasının Dövlət İmtahan Mərkəzi, Litva tərəfindən layihə tərəfdaşları isə Litva Respublikasının Dövlət Katibliyi, Dövlət Qulluğu Departamenti və Avropa Sosial Fond Agentliyi olub.
Layihənin əsas məqsədi Azərbaycanda qabaqcıl Avropa təcrübəsinə uyğun olan peşəkar, dayanıqlı dövlət qulluğu sisteminin daha da inkişaf etdirilməsinə töhfə vermək, vəzifə sisteminin təsnifatlandırılması, onun işəgötürmə, fəaliyyətin qiymətləndirilməsi və əməkhaqqı sistemi ilə əlaqələndirilməsi üçün Dövlət İmtahan Mərkəzinin mövcud imkanlarının və fəaliyyətinin səmərəliliyini artırmaq, həmçinin mövcud alətləri təkmilləşdirməkdir.
AZƏRTAC xəbər verir ki, bağlanış mərasimində Azərbaycan və Litvanın dövlət qurumlarından, o cümlədən Avropa İttifaqının ölkəmizdəki nümayəndəliyindən bir sıra vəzifəli şəxslər çıxış ediblər.
Dövlət İmtahan Mərkəzinin Direktorlar Şurasının sədri Məleykə Abbaszadə çıxışında qeyd edib ki, layihə çərçivəsində litvalı həmkarlarımızla birgə bir çox yerli təşkilatlarla mühüm işlər görülüb, onlar üçün treninqlər keçirilib, vəzifələrin təsnifat sisteminin təkmilləşdirilməsi, dövlət qulluğuna qəbul sisteminin daha da inkişaf etdirilməsi, fəaliyyətin qiymətləndirilməsi, əməkhaqqı sisteminin təkmilləşdirilməsi istiqamətləri üzrə təkliflər irəli sürülüb və kifayət qədər müsbət nəticələr əldə edilib. Sədr bildirib ki, bu layihə çərçivəsində bir çox praktik nəticələr də əldə edilib. Məsələn, xidməti fəaliyyətin qiymətləndirilməsi sahəsində təqdim olunan yeni yanaşmalar çox müsbət qarşılanıb. Həmçinin layihənin hər bir komponenti üzrə ekspertlər tərəfindən zəruri tövsiyələr verilib və gələcək üstünlüklər barədə geniş izahat işləri aparılıb. Sahənin hərəkətverici qüvvəsi hesab olunan bir komponent - mükafatlandırma sistemi ilə bağlı 14 ekspert missiyası və 1 təlim səfəri baş tutub. Mükafatlandırma sistemi haqqında qanun layihəsinin işlənib hazırlanması ilə bağlı müqayisəli araşdırmalar və müxtəlif hesablamaların dəqiq təhlili aparılıb və hazırda bu qanun artıq qəbul olunmaq mərhələsindədir.
Avropa İttifaqının Azərbaycandakı nümayəndəliyinin rəhbəri Kestutis Jankauskas çıxış edərək layihə çərçivəsində həyata keçirilən tədbirləri və aparılan islahatları müsbət qiymətləndirib. Diqqətə çatdırıb ki, Avropa İttifaqı bu sahədə fəaliyyətə və həyata keçirilən islahatlara dəstək göstərməyə daim hazırdır.
Tədbirdə, həmçinin Litvanın ölkəmizdəki səfiri Valdas Lastauskas, Azərbaycan Respublikası Milli Məclisinin hüquq siyasəti və dövlət quruculuğu komitəsinin sədri Əli Hüseynli, əmək və əhalinin sosial müdafiəsi nazirinin müavini Mətin Kərimli, Azərbaycan Respublikası Prezidenti Administrasiyasının kadr məsələləri şöbəsinin kadr siyasəti sektorunun müdiri Vasif Xələfov çıxış ediblər.
Çıxışlarda hazırda publik hüquqi şəxs olan Dövlət İmtahan Mərkəzinin əslində tələbə qəbulundan başlamış dövlət qulluğu sahəsində imtahanların keçirilməsinədək uzun illərdir şəffaf fəaliyyət göstərdiyi vurğulanıb.
Tədbir təqdimatlarla davam edib.
Litva tərəfindən layihə rəhbəri Alminas Maciulis layihə çərçivəsində həyata keçirilən təcrübə mübadiləsinin hər iki tərəf üçün faydalı olduğunu bildirib. Qeyd edib ki, “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”nın 2018-ci ilin noyabrında qəbul edilməsi dövlət qulluğunun daha da inkişafı baxımından olduqca əhəmiyyətli hadisədir. O, gələcəkdə də Litvanın Azərbaycanla sıx əlaqələr qurmağa hazır olduğunu və 2019-cu ildə Azərbaycan-Litva diplomatik əlaqələrinin 100 illiyinin qeyd olunacağını vurğulayıb.
Layihənin Azərbaycandakı Rezident Tvinninq müşaviri Edvardas Jukauskas iki il ərzində əldə edilən nəticələrdən danışıb. Bildirib ki, layihə 4 əsas istiqamətdə fəaliyyət göstərib: dövlət qulluğu vəzifələrinin məzmun yönümlü qruplaşdırılması, dövlət qulluğuna işə qəbulda yeni seçim metodlarının təklifi, dövlət qulluqçularının fəaliyyətinin qiymətləndirilməsi və əməkhaqqı sistemi üzrə təkliflər. Qeyd edib ki, bu istiqamətləri əlaqələndirə biləcək universal həll yolu kompetensiyaya əsaslanan İnsan Resurslarının İdarəetmə (İRİ) modelinin tətbiqidir və artıq bu ideya “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”da öz əksini tapıb.
Dövlət qulluğu vəzifələrinin yeni təsnifatı ilə bağlı həyata keçirilən işlər barədə danışan Edvardas Jukauskas oxşar vəzifələr üçün tələb olunan bilik və bacarıqların ümumiləşdirilməsi və dövlət səviyyəsində İRİ-ni asanlaşdırmağa yardım edən standart vəzifə profillərinin və bilik, bacarıqlar sisteminin yaradıldığını qeyd edib. Layihənin ikinci komponenti olan dövlət qulluğuna qəbul prosesinin təkmilləşdirilməsi ilə bağlı o, təklif olunan əsas ideyanın seçim prosesində namizədin biliyinin yoxlanılması dərəcəsinin azaldılaraq, daha çox onların bilik və bacarıqlarının, potensialının yoxlanılmasına diqqət yönəldilməsi olduğunu vurğulayıb.
Son olaraq Rezident Tvinninq Müşaviri təklif edilən yeni əməkhaqqı sistemində əsas ideyalardan biri kimi əməkhaqqı strukturunun hər bir komponentinin çox dəqiq məqsədinin olması və görülən işin keyfiyyətindən asılı olaraq əməkhaqqı sistemində horizontal ödənişlərin artırılması imkanının verilməsindən danışıb. Vurğulayıb ki, dövlət qulluqçularının əməkhaqqı barədə hazırlanan qanun layihəsi müvafiq orqanlara rəy verilməsi üçün artıq təqdim olunub və layihənin təkcə son bir neçə ayı ərzində bu qanun layihəsi üzərində işlədiyimizə baxmayaraq, biz çox məmnunuq ki, layihənin sonuncu komponenti üzrə daha böyük nailiyyət əldə olunub.
Edvardas Jukauskas, həmçinin layihə müddətində keçirilən görüşlər, seminarlar, təlim səfərlərinin həm Dövlət İmtahan Mərkəzi, həm də dövlət orqanlarının müvafiq əməkdaşlarının Aİ ölkələrində mövcud olan müasir İRİ həlləri ilə tanışlığı baxımından önəmli olduğunu vurğulayıb.
Tədbirin sonunda iştirakçıların sualları cavablandırılıb.
Bölmənin digər xəbərləri
