Ağcabədi, 13 noyabr, Tahir Ağaməmmədov, AZƏRTAC

“Ölkəmizi tanıyaq” devizi ilə keçirilən maarifləndirici tur-aksiyaya qoşulan Laçın rayonunun məktəbliləri Quba-Qusar-Xaçmaz marşrutu üzrə ekskursiyaya başlayıblar.

AZƏRTAC-ın bölgə müxbiri xəbər verir ki, laçınlı məktəblilər maarifləndirici tur-aksiyaya məskunlaşdıqları Ağcabədi rayonu ərazisindəki Taxtakörpü qəsəbəsindən yola salınıblar. Tus-aksiya iştirakçıları ilə keçirilən görüş zamanı Laçın Rayon İcra Hakimiyyətinin başçısı Aqil Nəzərli ölkəmizdə gənclərin hərtərəfli inkişafı üçün yaradılan şəraitdən, onların savadlı, vətənpərvər böyüməsi və fiziki inkişafı istiqamətində görülən işlərdən danışıb, məktəblilərə səfərlərinin xoş və mənalı keçməsi üçün tövsiyələr verib.

Bildirilib ki, ölkəmizdə həyata keçirilən dövlət gənclər siyasətinin başlıca məqsədlərindən biri gənc nəslin bilikli, dünyagörüşlü formalaşması, Vətənə məhəbbət ruhunda tərbiyə olunmasıdır. “Ölkəmizi tanıyaq” adı ilə keçirilən maarifləndirici tur-aksiyada da məqsəd gənclərin dünya görüşünü daha da zənginləşdirmək, onlara Vətənimizi daha yaxından tanıtmaq və sevdirməkdir.

Qeyd olunub ki, Quba-Qusar-Xaçmaz bölgəsində turizmin inkişafı istiqamətində çox böyük işlər görülüb. Bu bölgə həm gözəl təbiəti, həm də tarixi məkanları ilə tanınır. Odur ki, hər bir şagird onlar üçün yaradılan bu şəraitdən istifadə edərək, bölgə haqqında geniş məlumatlar əldə etməli, səfərlərinin mənalı və səmərəli keçməsinə çalışmalıdır.

Təhsil işçiləri və valideynlər məktəblilərə səfərlə bağlı tövsiyələrini verib, onlara mənalı istirahət, zəngin təəssürat arzulayıblar.

Laçın rayon 37 nömrəli tam orta məktəbin şagirdi Xoşbəxt Əsədullayeva AZƏRTAC-a müsahibəsində deyib: "Tur-aksiyada iştirak etdiyimə görə çox sevinirəm. Bu gün Azərbaycanın Quba, Qusar, Xaçmaz rayonlarına səfərə çıxırıq. Bu bölgə haqqında televiziyadan, kitablardan məlumatım var. Bilirəm ki, gözəl təbiəti, dağları, meşələri olan, eyni zamanda, tarixi abidələrlə zəngin bölgədir. İnanıram ki, səfərdən xoş təəssüratlarla qayıdacağıq. Aksiyanın təşkilatçılarına minnətdarlığımı bildirirəm”.

Tur-aksiyada iştirak edən şagird və müşayiətçilər ulu öndər Heydər Əliyevin Taxtakörpü qəsəbəsindəki büstünü ziyarət etdikdən sonra xatirə şəkli çəkdirib, onlar üçün ayrılmış avtobusla Quba-Qusar-Xaçmaz istiqaməti üzrə yola düşüblər.