Sosial şəbəkələrdə narkotik vasitələr və psixotrop maddələr satan doqquz nəfər saxlanılıb VİDEO
Həmin şəxslərdən 30 kiloqramdan artıq narkotik vasitə və psixotrop tərkibli 4778 həb aşkarlanıb
Bakı, 6 iyul, AZƏRTAC
Daxili İşlər Nazirliyinin (DİN) Baş Narkotiklərlə Mübarizə İdarəsinin əməkdaşları narkotik vasitə və psixotrop maddələrin qanunsuz dövriyyəsi, sosial şəbəkələrdə təmassız, yəni, onlayn yolla satışı ilə məşğul olan şəxslərin aşkarlanaraq məsuliyyətə cəlb olunmaları istiqamətində növbəti genişmiqyaslı əməliyyatlar həyata keçiriblər.
DİN-in mətbuat xidmətindən AZƏRTAC-a bildiriblər ki, Baş İdarə əməkdaşlarının Suraxanı rayonunda həyata keçirdikləri əməliyyat zamanı paytaxt sakini, əvvəllər məhkum olunmuş Abdul Çopurov saxlanılıb. Onun üzərindən və yaşadığı evdən 12 kiloqramdan artıq heroin, narkotik vasitə istifadəçiləri arasında “patı”, “şüşə” kimi adlandırılan psixotrop maddə - 4 kiloqram 70 qram metamfetamin və narkotik vasitələrin satışı zamanı istifadə etdiyi elektron tərəzi aşkarlanıb. Saxlanılan şəxs narkotik vasitə və psixotrop maddələri satmaq məqsədilə sosial şəbəkələrdə tanış olduğu xarici ölkələrdən birinin vətəndaşından əldə etdiyini bildirib.
Baş İdarənin əməkdaşlarının Yasamal rayonunda həyata keçirdikləri daha bir əməliyyat zamanı satışı qadağan olunan psixotrop tərkibli həblərin satışı ilə məşğul olan paytaxt sakini Anar Məmmədov saxlanılıb. Onun üzərindən 10 ədəd tramadol”, 10 ədəd preqabalin, 9 ədəd metadon həbi aşkar olunub. Əməliyyat tədbirlərinin davamı olaraq Anar Məmmədovun Yasamal rayonunda yerləşən mənzilindən əlavə olaraq 680 ədəd metadon, 20 ədəd preqabalin, 80 ədəd tramadol, əsasən gənclər arasında satılması nəzərdə tutulan 40 ədəd ekstazi həbi, 200 qrama yaxın olduqca təhlükəli psixotrop maddə hesab edilən mefedron və bir elektron tərəzi aşkar edilib.
Qeyd edək ki, Anar Məmmədov ifadəsində əsasən sosial şəbəkələrdə narkotik vasitələrin satışını həyata keçirdiyini və satdığı psixotrop tərkibli həblərin pulunu onlayn yolla qəbul etdiyini bildirib.
Baş İdarə əməkdaşlarının Yasamal rayonunda həyata keçirdikləri digər bir əməliyyat zamanı isə narkotik vasitələrin satışında şübhəli bilinən daha iki nəfər - paytaxt sakinləri Aleksandr Naqorni və Sərxan Daşdəmirli saxlanılıblar. Onların üzərlərindən və yaşadıqları evlərdən ümumilikdə 42 qrama yaxın metamfetamin, kimyəvi tərkibli narkotik vasitə olan bonzai, həmçinin satışı qadağan olunan 1295 ədəd preqabalin və ekstazi həbi, bir elektron tərəzi və narkotik vasitələrin sosial şəbəkələrə satışı zamani nağdsız pul köçürmələrində istifadə etdiyi plastik kart aşkarlanaraq götürülüb.
Narkotik vasitələrin qanunsuz dövriyyəsinə qarşı Baş İdarə əməkdaşlarının Nəsimi rayonunda həyata keçirdikləri daha bir əməliyyat zamanı əvvəllər dəfələrlə məhkum olunmuş Vadim Şəfiyev və Mərahim Şahbazov saxlanılıblar. Onlardan ümumilikdə 12 kiloqramdan artıq, o cümlədən 8 kiloqram 90 qram heroin, 2 kiloqram 725 qram tiryək, 1 kiloqram 375 marixuana və 2 elektron tərəzi aşkar edilib.
Baş Narkotiklərlə Mübarizə İdarəsinin əməkdaşlarının onlayn yolla narkotik vasitələrin satışını həyata keçirən şəxslərlə mübarizə istiqamətində həyata keçirdiyi daha bir əməliyyat zamanı əvvəlcə vətəndaş İlqar Bayramov saxlanılıb. Onun üzərindən və yaşadığı ünvandan 7 qrama yaxın çox təhlükəli narkotik vasitələr qrupuna aid kokain, 117 qram bonzai, 60 qram metamfetamin, 1124 ədəd narkotik tərkibli həblər və 1 elektron tərəzi aşkarlanıb.
Əməliyyat tədbirlərinin davamı olaraq İlqar Bayramova narkotik vasitələri onlayn yolla satan paytaxt sakini Samir Ağayev də tutulub. Onun üzərindən və Nizami rayonunda yaşadığı evdən 632 ədəd ekstazi həbi, 48 qram kokain və elektron tərəzi götürülüb. Araşdırma zamanı həmin şəxslərin sosial şəbəkələrdə müxtəlif profillər açaraq əsasən gənclər arasında narkotik vasitələrin və psixotrop tərkibli həblərin onlayn yolla satışını təşkil etdikləri məlum olub.
Baş İdarə əməkdaşlarının onlayn yolla narkotik vasitələr satan şəxslərə qarşı paytaxtın Sabunçu rayonunda həyata keçirdikləri sonuncu əməliyyat zamanı isə vətəndaş Raib Hüseynov saxlanılıb. Onun üzərindən və yaşadığı evdən 400 qrama yaxın kokain, metamfetamin, bonzai, marixuana, eləcə də ümumilikdə 878 ədəd ekstazi, preqabalin, metadon həbləri və elektron tərəzi aşkar edilib.
Bu əməliyyatlar zamanı Baş İdarənin əməkdaşları tərəfindən ümumilikdə 30 kiloqramdan artıq narkotik maddə, o cümlədən, 4778 ədəd psixotrop tərkibli ekstazi, preqabalin, metadon və tramadol həbləri aşkarlanaraq qanunsuz dövriyyədən çıxarılıb.
Faktlarla bağlı Cinayət Məcəlləsinin müvafiq maddələri ilə cinayət işləri başlanılıb və adları sadalanan şəxslər tutularaq istintaqa cəlb olunublar. Cinayət işləri üzrə zəruri istintaq-əməliyyat tədbirləri davam etdirilir.
Sosial şəbəkələr vasitəsi ilə ölkə ərazisində narkotik vasitələrin satışını təşkil edən və xaricdən idarə olunan səhifələrə qarşı Daxili İşlər Nazirliyinin mütəxəssisləri tərəfindən daim xüsusi texniki vasitələrdən istifadə olunmaqla əməliyyat tədbirləri həyata keçirilir. Sosial şəbəkələrdə xaricdəki narkotacirlərin təkliflərinə ölkə ərazisində razılıq verən şəxslər bilməlidirlər ki, onlara qarşı sərt mübarizə tədbirləri bundan sonra da davam etdiriləcək və onlar polis əməkdaşları tərəfindən ifşa ediləcəklər.
Bölmənin digər xəbərləri
