2005-Cİ İL ŞƏKİ ÜÇÜN DƏ UĞURLU OLMUŞDUR
Şəhər rəhbərliyi və qonaqlar əvvəlcə ümummilli liderimiz Heydər Əliyevin abidə-kompleksini ziyarət etmiş, heykəlin önünə gül-çiçək düzmüşlər. Sonra icra hakimiyyəti binasının foyesində yerli məhsulların sərgisi ilə tanış olmuşlar.
Şura iclasında Şəki şəhər icra hakimiyyətinin başçısı Nazim İbrahimovun icra hakimiyyəti aparatının 2005-ci ildəki fəaliyyəti ilə bağlı geniş hesabat məruzəsi dinlənilmişdir. Natiq bildirmişdir ki, artıq tarixə çevrilən 2005-ci il Şəki rayonu üçün də uğurlu olmuşdur. 2005-ci ildə faktiki qiymətlərlə 109,4 milyon (AZN) manatlıq məhsul buraxılmışdır ki, onun da 14,9 faizi dövlət, 85,1 faizi isə qeyri-dövlət bölməsinin payına düşür. Əvvəlki illə müqayisədə 2005-ci ildə məhsul buraxılışının həcmi 14,6 milyon manat və ya 18,1 faiz artmışdır. Hesabat ilində rayon üzrə adambaşına düşən məhsul istehsalının həcmi əvvəlki illə müqayisədə 16,9 faiz artaraq, 574,5 manat təşkil etmişdir.
Əhalinin məşğulluğunun təmin edilməsində və rifahının yaxşılaşdırılmasında regionların sosial-iqtisadi inkişafı Dövlət Proqramının xüsusi əhəmiyyəti olmuşdur. Ötən il rayonda 1433 və ya 33,7 faizi daimi olmaqla, 4246 yeni iş yeri yaradılmışdır. O cümlədən, yeni açılan müəssisə və təşkilatlarda 942, mövcud müəssisə və təşkilatlarda isə 491 yeni iş yeri açılmışdır. İl ərzində 2813 nəfər rayon sakini mövsümi işlərə cəlb olunmuşdur.
2005-ci ildə rayonda bir sıra tikinti, abadlıq və quruculuq işləri həyata keçirilmişdir. Heydər Əliyev prospektində ulu öndərimizin əzəmətli abidəsi ucaldılmışdır. Salman Mümtaz küçəsinin şimal hissəsində, Şəki Olimpiya İdman Kompleksinin qarşısında Heydər Əliyev adına park salınmış, orada ulu öndərin həyat və fəaliyyətini əks etdirən muzey yaradılmış, qarşısında dahi rəhbərin büstü qoyulmuşdur.
2005-ci ildə icra hakimiyyətinin təşəbbüsü ilə sahibkarların vəsaiti hesabına 16 milyon şərti banka istehsal gücü olan 1,7 milyon (AZN) manat dəyərində konserv zavodunun, 20 milyon ədəd istehsal gücü olan 3,5 milyon ABŞ dolları dəyərində kərpic zavodunun, 300 min manat dəyərində “Şəki Şirələri İstehsal Kommersiya” MMC-nin, uzun illərdən bəri inşası yarımçıq qalmış idman sağlamlıq mərkəzinin, Dövlət Sərhəd Xidmətinin Şəki sərhəd dəstəsi və Şəki mülki müdafiə regional mərkəzi üçün inzibati və yardımçı binaların, Əlillərin bərpa mərkəzinin, Şin çayı üzərində 1,2 milyon manat dəyəri olan 169 metr uzunluğunda körpünün tikintisi başa çatdırılaraq istifadəyə verilmişdir. Hazırda Şəki şəhərində Qarabağ müharibəsi əlilləri və şəhid ailələri üçün 8 mənzilli yaşayış binasında son tamamlama işləri aparılır.
Ümummilli liderimiz Heydər Əliyevin təşəbbüsü ilə inşasına başlanmış və onun adını daşıyan 640 yerlik Kiş kənd orta məktəbi, Heydər Əliyev Fondunun prezidenti, YUNESKO-nun xoşməramlı səfiri Mehriban Əliyevanın təşəbbüsü ilə 3, yerli iş adamının xeyriyyəçiliyi və regionların sosial-iqtisadi inkişafı Dövlət Proqramına uyğun olaraq daha 2 məktəb binası tikilərək istifadəyə verilmiş, 7 məktəbdə əsaslı təmir işləri aparılmışdır.
Ötən il rayonda ümumi sahəsi 12,6 min kvadratmetr olan fərdi yaşayış evləri tikilib istifadəyə verilmiş, şəhərin inkişaf planına uyğun olaraq, yeni yaşayış massivində əhaliyə fərdi ev tikintisi üçün 20 hektar torpaq sahəsi ayrılmışdır. İl ərzində küçə, meydan və parklarda ümumilikdə 30 min kvadratmetr sahə abadlaşdırılmış, 15 kilometr yola asfalt döşənmiş, 60 kilometr uzunluğunda kəndarası yollarda əsaslı və cari təmir işləri aparılmışdır.
Hazırda şəhərin mərkəzində müasir mehmanxana binasının, “Gələrsən-görərsən” və “Soyuqbulaq” ərazilərində istirahət komplekslərinin inşası davam etdirilir. Onların istifadəyə verilməsi beş yüzə yaxın yeni iş yerinin açılması deməkdir.
Məruzədə həllini gözləyən problemlər və perspektiv planlar barədə də danışılmışdır. Bildirilmişdir ki, regionların sosial-iqtisadi inkişafı proqramına uyğun olaraq, Şəkidə indiki Azərbaycan Müəllimlər İnstitutunun bazasında müstəqil dövlət universitetinin açılması, 87 meqavat gücündə modul tipli elektrik stansiyasının inşasının başa çatdırılması, Şin çayı üzərində su elektrik stansiyasının, region üçün xüsusi əhəmiyyətə malik, gündəlik emal gücü 250 ton olan şəkər çuğunduru zavodunun, pivə zavodunun tikintisi, turizmin inkişafı məqsədi ilə Aşağı Karvansara kompleksinin bərpası, şəhərin su-kanalizasiya sisteminin yenidən qurulması, xarici sərmayə qoyuluşu hesabına süd emalı ilə məşğul olacaq 6 milyon avro dəyərində sənaye kompleksinin, habelə camışçılıq, quşçuluq, donuzçuluq komplekslərinin yaradılması, üzümçülüyün inkişafı istiqamətində Fransa və İtaliya şirkətləri ilə birgə layihələrin həyata keçirilməsi, 3500 yerlik şəhər stadionunun, yeni məktəblərin və səhiyyə obyektlərinin tikintisi, abadlıq və quruculuq işlərinin davam etdirilməsi və s. qarşıda duran əsas vəzifələrdəndir.
Şura iclasında rayonun ayrı-ayrı idarə, müəssisə və təşkilatlarının, xidmət sahələrinin 2005-ci ildəki fəaliyyətinə dair hesabatlar dinlənilmiş, yol verilmiş nöqsanlardan və onların aradan qaldırılması yollarından danışılmışdır.
İclasda ədliyyə naziri Fikrət Məmmədov və Milli Məclisin deputatı Yaqub Mahmudov çıxış etmiş, tövsiyələrini, arzu və təkliflərini bildirmişlər.
Sonra hüquq mühafizə orqanları əməkdaşlarının və xidmət təşkilatlarında çalışanların bir qrupuna 2005-ci ildə qazandıqları uğurlara görə şəhər icra hakimiyyətinin fəxri fərmanları və qiymətli hədiyyələri təqdim olunmuşdur.
İclas iştirakçıları adından Azərbaycan Prezidenti İlham Əliyevə müraciət qəbul edilmişdir.
Bölmənin digər xəbərləri
