20 ildən çoxdur avtomobilləri təmir edən xanım işindən çox məmnundur - REPORTAJ VİDEO
Ağstafa, 8 mart, Ruslan Novruzoğlu, AZƏRTAC
Zərif cinsin nümayəndələri zaman-zaman istənilən şəraitdə, hətta kişilərin belə öhdəsindən çətinliklə gəldiyi peşələrdə çalışmaq bacarığını göstəriblər.
AZƏRTAC-ın bölgə müxbiri xəbər verir ki, Ağstafa sakini Aynurə Abadova da bu cür xanımlardan biridir. O, 20 ildən çoxdur ki, avtomobillərin isitmə qurğusunun, radiatorlarının təmiri ilə məşğuldur.
Nə qədər ağır olsa da işini yorulub usanmadan, dəqiqliklə yerinə yetirir. Hər gün avtomobillərin müxtəlif ölçülü isitmə qurğularını söküb təmir edir. Ağstafa şəhər sakini A.Abadova deyir ki, həyat yoldaşı da avtomobil ustası olduğu üçün ona kömək məqsədilə işə başlayıb və sonradan illər keçdikcə bu sahədə təcrübə əldə edib. Bu işdə ona oğlu da yardımçı olub. İllər keçdikcə nəinki kiçikqabaritli avtomobillərin, hətta TIR və tankların da radiatorunu təmir etdiyini deyir. “Oğlum əsgərliyə gedənə qədər mənə kömək edirdi. Sonra o, hərbi xidmətə yollandı və bu ərəfədə 44 günlük Vətən müharibəsi başladı. Sevinirəm ki, oğlum da döyüşlərdə iştirak edib. Həmin vaxtlarda burada tək işləyirdim. Çünki tələbat çox idi. Xarici və keçmiş sovet istehsalı olan maşınların radiatorlarını təmir edirəm. Hətta tankların radiatorlarına da baxmışam. Tək işlədikcə adam daha da məsuliyyətli olur, təcrübəsi çoxalır. İşimi çox sevirəm”, - deyə o bildirib.
Aynurə Abadova 3 övlad anasıdır. Hazırda 24 yaşlı oğlu ona ağır işlərində kömək edir. Oğlu Şaiq Vətən müharibəsindən qayıtdıqdan sonra anası ilə birlikdə çalışır. A.Abadova deyir ki, təzə bu işə başlayanda müştərilər onun xanım olduğunu görüb təəccüblənsələr də, avtomobillərinin tez bir zamanda təmir edildiyini gördükdən sonra isitmə qurğusunda bir problem yaranan kimi yalnız ona müraciət edirlər.
İndiyə qədər saysız-hesabsız avtomobillərin radiatorlarını təmir edən, su buraxan yerlərini qalaylayıb, cilalayıb nizama salan Aynurə Abadova peşəsinə o qədər bağlıdır ki, bu ağır iş onu nə yormur, nə də qorxutmur. Onun timsalında bir daha görünür ki, zərif cinsin nümayəndələri “bu, kişi peşəsidir” deyilən sahələrdə çalışarkən belə onlardan heç də geri qalmadıqlarını göstərirlər. Biz onlardan, sadəcə, birini sizlərə tanıda bildik. Belə xanımlarımızın sayı isə kifayət qədərdir.
Bölmənin digər xəbərləri
