Azərbaycanın ən böyük beton istehsalçılarından biri yubileyini qeyd edib
Bakı, 6 dekabr, AZƏRTAC
2002-ci ildə yaradılan və ölkənin ən böyük beton istehsalçılarından biri olan “Crystal Beton” Qapalı Səhmdar Cəmiyyəti “Keyfiyyətin və dürüstlüyün ünvanı” şüarı altında 20 illik yubileyini xüsusi ziyafətlə qeyd edib.
Yubiley tədbirində şirkətin kollektivi, investorlar, tərəfdaşlar, həmçinin yerli və xarici qonaqlar iştirak ediblər.
Şirkət nümayəndələrinin çıxışları ilə başlayan tədbirdə qonaqlara şirkətin uğurlu fəaliyyəti barədə məlumat verilib, keçdiyi yola nəzər salınıb və gələcək hədəflərindən söz açılıb. Daha sonra qala gecəsi xüsusi dəvət olunmuş musiqi kollektivlərinin ifaları ilə davam edib.
Qeyd edək ki, şirkətin yaranması, inkişafı və uğurla fəaliyyət göstərməsi Ulu Öndər Heydər Əliyev tərəfindən Azərbaycanda iqtisadiyyatın və sahibkarlığın uğurla inkişaf etdirilməsi sahəsində həyata keçirilən tədbirlər nəticəsində mümkün olub və o dövrdən başlayaraq ölkəmizdə geniş vüsət alan irimiqyaslı tikinti- quruculuq və abadlıq işlərinin məntiqi nəticəsidir.
Şirkətin əsas vəzifəsi beton istehsalında qabaqcıl texnologiyanın həlli yollarının daha geniş tətbiqinə nail olmaq və keyfiyyət standartlarını qorumaqla səmərəli nəticələr əldə etməkdən ibarətdir.
Cəmiyyət fəaliyyəti dövründə beton istehsalı sahəsində müasir texnologiyaların Azərbaycana gətirilməsi, beynəlxalq standartlara cavab verən idarəetmə sistemlərinin tətbiqi, eləcə də yeni iş yerlərinin yaradılması siyasətinə sadiq qalaraq ölkəmizdə özəl sektorun inkişafına təkan verən şirkətlərdən olub.
Sahibkarlığın inkişafına dövlət dəstəyi ilə bağlı Azərbaycan Prezidenti İlham Əliyevin müxtəlif dövrlərdə imzaladığı fərman və sərəncamlar, milli sahibkarlığa ardıcıl şəkildə göstərilən dövlət qayğısı cəmiyyətin fəaliyyətində başlıca yol xəritəsidir.
Yarandığı ilk gündən tikinti bazarında özünə dayanmadan tərəfdaşlar qazanan şirkət bir çox inşaat layihələrinə imza atıb və milli tikinti sektorunun inkişafına dəyərli töhfəsini verib.
Bölmənin digər xəbərləri
