Bakı, 3 iyul (AZƏRTAC). Azərbaycan Dövlət Teleqraf Agentliyinin (AZƏRTAC-ın) “Gəzdim Azərbaycanı” layihəsi bu dəfə ölkəmizin qədim mədəniyyət və poeziya beşiyi olan Şamaxıdan bəhs edir. 

Videosüjetdə Azərbaycanın müasirləşən və modernləşən bölgələri arasında xüsusi yer tutan Şamaxının tarixi, mədəniyyəti, incəsənəti, iqtisadiyyatı, təbiəti və turizm potensialı barədə məlumat verilir.

Reportajda qeyd olunur ki, zəlzələlər nəticəsində dörd dəfə yerlə-yeksan olmuş Şamaxı uzun illər əvvəlki görkəmini geri qaytara bilməsə də, yenidən dirçələrək Azərbaycanın mədəniyyət tarixinə öz adını yazmağı bacarmışdır.

Reportajda Şamaxının Böyük Xınıslı kəndi ərazisində yerləşən, dəfələrlə düşmən hücumları və zəlzələlər nəticəsində dağılan “Gülüstan qalası”nın tarixinə də geniş yer verilmişdir. “Qız qalası” kimi də tanınan “Gülüstan qalası” Şirvanşahların əsas iqamətgahı olmuşdur. Burada aparılan arxeoloji tədqiqatlar zamanı XI-XII əsrlərə aid bir çox əşya və alətlər, yeraltı gizli yol aşkar edilmişdir.

Şamaxının dahilər vətəni olması da videosüjetdə xüsusi qeyd edilir. Əfzələddin Xaqani, İmadəddin Nəsimi, Seyid Əzim Şirvani, Mirzə Ələkbər Sabir kimi böyük söz ustadları Şamaxıda doğulmuş, burada yazıb yaratmışlar. Şəhərdəki tarixi Şıxəndan qəbiristanlığında Azərbaycan şairi, maarifçi və mütəfəkkir S.Ə.Şirvaninin məzarı, satira nəhəngi M.Ə.Sabirin məqbərəsi vardır. Sabirin ev-muzeyi də məhz Şamaxı şəhərindədir.

Videorepotajda Prezident İlham Əliyevin Sərəncamı ilə yenidən bərpa olunmuş və bu ilin mayında dövlətimizin başçısının iştirakı ilə açılmış Cümə məscidindən geniş bəhs edilir. Cümə məscidi Şamaxı memarlığının şah əsərlərindən sayılır. O, 743-cü ildə inşa edilmiş və Yaxın Şərqin mühüm dini mərkəzlərindən biri kimi fəaliyyət göstərmişdir. Cümə məscidi Şamaxının, eyni zamanda, Azərbaycanın qədim tarixi-dini abidəsi olmaqla Cənubi Qafqazın ən möhtəşəm müsəlman ibadətgahıdır.

Videoda Şamaxının həm də sənaye şəhəri olması vurğulanır. Burada “Star” şirkətlər qrupunun televizor zavodu fəaliyyət göstərir. Bu zavodda analoq televizorları ilə yanaşı, LCD televizorlar da istehsal edilir. Eyni zamanda, Şamaxıda məişət cihazları zavodu da vardır. Zavodda soyuducu, paltaryuyan və qabyuyan maşınlar, kondisionerlər istehsal olunur.

Şamaxı xalçaları da süjet müəlliflərinin diqqət mərkəzində olmuşdur. Şirvana şöhrət gətirən müxtəlif çeşnili xalçaları Şamaxı tacirləri təkcə Azərbaycanda deyil, bütün dünyada satışa çıxarırdılar. Şirvan taxt-tacında bir vaxtlar böyük dəyər verilən Şirvan xalçaları bu gün də istehsal olunur.

Süjetdə Şamaxıda yerləşən ən böyük və müasir Olimpiya İdman Kompleksi barədə söhbət açılır, eyni zamanda, rayonun respublikanın turizm mərkəzlərindən biri olduğu qeyd edilir.

Reportajda Şamaxının müasir atributuna çevrilən Nəsirəddin Tusi adına Astrofizika Rəsədxanası diqqət mərkəzində olmuşdur. Rəsədxana bu ilin mayında Prezident İlham Əliyevin iştirakı ilə yenidənqurmadan sonra açılmışdır. Burada yenilənmiş teleskoplar, ərazidə yaradılan yüksək şərait nümayiş etdirilir.

Müəlliflər qeyd edirlər ki, tarixlə müasirliyin vəhdətini özündə yaşadan qədim Şamaxı bu gün yenilənir və daha da gözəlləşir.

Videoreportajla və həmçinin Azərbaycanın digər bölgələrindən hazırlanmış tanıtım videoları ilə bu linkdən http://azertag.com/the_modernizing_districts tanış olmaq mümkündür.