Laçın, 28 avqust, Aydın Yavərzadə, AZƏRTAC

“Şəhər günü” münasibətilə bayram tədbirləri Laçının Heydər Əliyev adına mərkəzi küçəsində davam edib. Mədəniyyət Mərkəzi kimi dirçələcək bu küçədə ölkənin tanınmış rəssam və tətbiqi sənət ustalarının iştirakı ilə qurulan etno-bazar böyük canlanma yaradıb.

AZƏRTAC-ın bölgə müxbiri xəbər verir ki, Laçında müxtəlif proqramların nümayiş olunduğu bayram şənliyi böyükdən kiçiyə hər kəsin marağına səbəb olub. Məxsusi Laçın mövzusunu, ornament və naxışları özündə əks etdirən kəlağayılar, bəzək, məişət nümunələri, eyni zamanda Laçında və laçınlıların hazırladıqları yerli məhsulların nümayişi qısa müddət ərzində məkana bağlı yeni milli brendlərin yaranacağından xəbər verib.

Azərbaycanda ilk dəfə milli nağıl qəhrəmanları maskotların yürüşü balaca laçınlılar üçün əsl sürpriz olub. Şuşa Dövlət Musiqili Dram Teatrının ifasında rejissor Loğman Kərimovun özəl olaraq Laçın günü üçün hazırladığı və əfsanəvi Sarı Aşıq haqqında rəvayətləri nəql edən “Aşıq və Yaxşı dastanı”, “Dəli Domrul” meydan tamaşalarını izləyicilər alqışlarla qarşılayıb.

Dünyada tanınmış fotoqraf Reza Deqatinin Heydər Əliyev küçəsindəki binaların fasadı üzərində qurulmuş konseptual sərgisi “Şəhər günü” münasibətilə Laçına dəvət alan xarici jurnalistlərin, diplomatik nümayəndələrin, turistlərin marağına səbəb olub. 31 illik işğaldan sonra azadlığına qovuşan Laçına köç edən yeni nəslin nəhəng fotoportretlərdən tamaşaçıya yönələn səmimi baxışları, məsum təbəssümü müharibələr əleyhinə olduqca təsirli və önəmli bir mesaj olub.

Bayram şousu Laçın şəhərinin yeni qurulmuş nəhəng aqro-sənaye parkında cins mal-qaranın yanında maskotların əyləncəli fotosessiyası ilə davam edib. Bu tədbirin məqsədi sakinlərə doğma şəhəri rəsmi ərazi bölgüsünə ayırmadan, bir-birini tamamlayan vahid, canlı məkan olaraq tanıtmaq, balaca sakinlərdə hər yaradılışa sevgi, şəfqət hissi təbliğ etməkdir.