Bakıda VI Robot Olimpiadası keçirilir VİDEO
Bakı, 1 sentyabr, AZƏRTAC
Sentyabrın 1-də Bakıda Milli Gimnastika Arenasında VI Robot Olimpiadasının açılış mərasimi keçirilib.
AZƏRTAC xəbər verir ki, açılış mərasimində iştirakçı komandalar, komandalarda yarışan uşaqların valideynləri və tamaşaçılar iştirak ediblər.
Əvvəlcə Vətənimizin azadlığı uğrunda şəhid olan qəhrəmanlarımız bir dəqiqəlik sükutla anılıb və Azərbaycan Respublikasının Dövlət Himni səsləndirilib.
Tədbirdə gənclər və idman nazirinin müavini İndira Hacıyeva çıxış edərək gənclərə uğurlar arzu edib. Diqqətə çatdırıb ki, artıq 6-cı dəfə respublikamızda Robot Olimpiadası təşkil olunur, builki Olimpiadada 160 komanda iştirak edir. Gənclər siyasətinin daim dövlətimizin başçısının diqqətində saxlanıldığını qeyd edən İndira Hacıyeva ölkəmizdə bu istiqamətdə geniş işlər görüldüyünü vurğulayıb.
Rəqəmsal inkişaf və nəqliyyat nazirinin müavini Fərid Əhmədov Olimpiada iştirakçılarının bəziləri ilə yaxından tanış olduğunu və gənclərdə bu sahəyə böyük maraq olduğunu bildirib: “Bu çox sevindirici haldır ki, belə gənc yaşda həmvətənlilərimiz həmin sahəyə böyük maraq göstərir", - deyə nazir müavini qeyd edib.
Belə yarışların gənclərin innovativ fikir formalaşdırdığını qeyd edən Fərid Əhmədov gələcəkdə bu uşaqlarda sahibkar ruhunun formalaşacağına ümidvar olduğunu bildirib.
Gənclər və İdman Nazirliyi, Elm və Təhsil Nazirliyi, Rəqəmsal İnkişaf və Nəqliyyat Nazirliyi, Dünya Robot Olimpiadası Assosiasiyası və Azərbaycan Robotexnika Mühəndisliyi Akademiyasının (AREA) birgə təşkilatçılığı ilə keçirilən VI Robot Olimpiadası sentyabrın 3-nə kimi davam edəcək.
Olimpiadada “Robomission”, “Robosports”, “Future innovators” və “Future engineers” olmaqla dörd kateqoriya üzrə 8 yaşdan 19 yaşadək yeniyetmə və gənclər yarışacaqlar.
Ümumilikdə bu kateqoriyalar üzrə respublikanın 20 rayon və şəhərindən 249 komanda qeydiyyatdan keçib. Onların hazırlıq səviyyəsi ilə bağlı monitorinqlər keçirilib və final mərhələsində 160 komanda iştirak etmək hüququ qazanıb. Əlavə olaraq, finala vəsiqə qazanmış komandalara Qusar Olimpiya İdman Kompleksində layihələrini inkişaf etdirmələri üçün yay düşərgəsi təşkil edilib. Düşərgə müddətində gənclərə müxtəlif interaktiv təlimlər keçirilib.
VI Robot Olimpiadasının iştirakçısı Əliağa Qəhrəmanlı bildirib ki, tədbirin keçirilməsi onlar üçün çox faydalıdır. Həm yay tətilinin son günlərini maraqlı keçirdiyini, həm də robototexnika ilə bağlı biliklərini inkişaf etdirdiyini vurğulayıb. Düzəltdiyi robotun yük daşınması prosesində faydalı iş əmsalını artırdığını qeyd edən iştirakçı tədbirin təşkil edilməsində əməyi olanlara minnətdarlığının bildirib.
Digər iştirakçı Ceyla Həsənli AZƏRTAC-a müsahibəsində deyib ki, olimpiadada ilk dəfə iştirak edir, gələcəkdə robototexnika sahəsi üzrə ali təhsil almağı planlaşdırır. Belə yarışlar sayəsində əylənərək öyrəndiyini sevinclə ifadə edən C.Həsənli yarışda qalib gəlməyi hədəflədiyini və ölkəmizi robototexnika sahəsində dünya arenasında təmsil etmək üçün əlindən gələni edəcəyini söyləyib.
VI Robot Olimpiadasında hakim olan Fariz Həsənli belə yarışlarda dəfələrlə bu vəzifəni icra etdiyini vurğulayıb. Tədbirin maraqlı təşkil edildiyini bildirən hakim bu il olimpiadada regionlarda yaşayan gənclərin ötən illərə nisbətən daha çox iştirak etdiyini rəğbətlə qarşılayıb. O, bu il daha çox rəqabətin olmasının sevindirici hal olduğunu, bu tip yarışların təşkilinin ənənə halı almasının Azərbaycanda həmin sahənin inkişafına böyük töhfə olduğunu ifadə edərək gənclərimizin dünya arenasına çıxışına yarışın təkan verməsinin xüsusi önəm daşıdığını vurğulayıb.
Qeyd edək ki, VI Robot Olimpiadasında qalib olmuş komandalar bu il noyabrın 7-9-da Panama Respublikasında keçiriləcək Dünya Robot Olimpiadasında ölkəmizi təmsil edəcəklər.
Bölmənin digər xəbərləri
