 |
2008-ci il. Dənizkənarı Milli Parkda Azərbaycan Prezidenti İlham Əliyevin və ölkənin birinci xanımı Mehriban Əliyevanın iştirakı ilə Beynəlxalq Muğam Mərkəzinin açılışı olub. Formasına görə qədim Azərbaycan musiqi alətlərindən birini - tarı xatırladan binada 350 tamaşaçı yeri olan zal, klub, tədris otaqları və səsyazma studiyası var. |
 |
1945-ci il. Beynəlxalq Valyuta Fondu (BVF) təsis edilib. Həmin gün 29 dövlət BVF-nin Xartiyasını imzalayıb. Hazırda BVF öz sıralarında 188 dövləti birləşdirir. Onun strukturlarında 133 ölkədən 2500 əməkdaş işləyir. |
 |
1822-ci il. Fransız kimyaçı alim, mikrobiologiya və immunologiyanın əsasını qoyanlardan biri Lui Paster (1822-1895) anadan olub. O, kimyada stereokimya deyilən yeni istiqamət açıb. L.Paster 1861-ci ildə maye ərzaq məhsullarının sonralar “pasterizasiya” adlandırılan istilik emalı ilə saxlanması üsulunu təklif edib. 1881-ci ildə Sibir xorası, 1885-ci ildə quduzluq əleyhinə vaksinlər hazırlayıb. |
 |
1922-ci il. Azərbaycanın Xalq Artisti, bəstəkar Oqtay Kazıminin (1922-2010) doğum günüdür. İstedadlı bəstəkar mahnı yaradıcılığı ilə bərabər, tamaşa və operettalara musiqi bəstələyib. Azərbaycanda ilk rok-operanın müəllifidir. |
